Jerita Orang Kaya Pemancha Dana “Bayang”

Nyadi O.K.P. Dana “Bayang” di Padeh tu anak biak Orang Kaya Betie “Tajai Ngindang” seduai Endau. Rambau tu menya, semina siko iya aja ti pemadu iya besai bendar kuasa, serta dikarap ka semua tuai Iban enggau tuai Kayau dalam menoa bagi kedua. Iya bisi enam iko anak lelaki, lalu tiga iko anak indu Sida tu iya nya : O.K.P Nanang, Luyoh, Aji (Saji), Unting, Buda, Umpu, Tiong (f), Landan (f) enggau Badong tauka “Kumang Badong”(f).

Tusut Penatai & Peturun OK Dana Bayang:

Raja Sempulang Gana x Endu Endun Serentum Tanah Tumboh = Cheremie (f) x Ajie (son of Sengalang Burong) = Lenya (f) x Gambing = Begura x Bata (f) = Pagan x Chanda (f) = Nantang x Derang (f) = Tenang (f) x Sukun = Kantan (f) x Kutok = Nuai (f) x Lassam (Isup) = Sukun x Beragai (f) = {Sawai (f)}, Tom x Telo (Bragai) (f) = OK Beti “Tajai Ngindang” x Endau (f) = (Isik, Nawie (f), Senaang, Mandah (f), Kitang, Suma (f), Angkum) OKP Dana “Bayang” x Mengan (from Rapong) = {Tiong (f), OKP Nanang, Luyoh, Unting, Buda, Umpu, Landan (f), Kumang Badung (f)}, Ajie x Dimah (f) = Mindu (f) x Panglima Budin “Gerasi” = Mengan (f) x Ketit = Isah (f) x Enau = Roselyne Petry (f) x Lionel Frederick Mawar = Gregory Nyanggau (Author).

Manok sabong ti pemadu di karap ka iya bendar nya : Sabok “Gila Berani” apai Mang, Uyu apai Ikom, Unal “Bulan”, Igoh apai Lamban, O.K. Akun “Bedindang”, Isiek enggau Senaang. Laban pemerani sida manok sabong tu, semua kayau O.K.P. Dana Bayang nadai kala enda mujor. Apin iya nyadi tuai tau serang leboh iya benong ngangkat ka diri bujang, iya bisi mimpi. Dalam mimpi iya, asai ka di padah ka Kumang ti diau di tuchong Bukit Santubong, enda ngasoh iya munoh sebarang orang ka diau senebing Batang Saribas terus ngagai Luba Santubong nyengkaum Batang KayongTimor Selatan nengeri Pontianak. Nya alai kategal mimpi iya tu, sepamanjai umor iya endang nadai kala ngalah ka Bansa Melanau ti diau sabelah luba Nanga Rajang enggau ngilah nya kin.

Nya alai ari mimpi iya nya tadi, tiap-tiap kali mansa Luba Santubong dalam pejalai iya mansang nyerang ngagai menoa ari luar nya, iya enda tau enda ngetu samalam dia, awak ka ulih niki ka Bukit Santubong, deka nanya ngagai Kumang pasal pemujur serang sida. Dalam bulan Tujoh taun 1800, OKP Dana Bayang mai perau 120 buah ari Batang Saribas enggau Skrang ngalah ka Sungai Raya, dalam menoa Kalimantan. Iya ngalah ka maioh Kampong enggau rumah panjai Melayu enggau Dayak Selakau serta munoh munsoh lebih 100 iko ba endor nya. Nambah ka nya, sida mega bulih maioh bendar tangkap ke lalu dibai sida pulai ka menoa.

Udah iya ka mujor bendar ngalah ka Sungai Raya, OKP Dana Bayang mai tuai Melayu Saribas enggau Iban ari Skrang ngalah ka nengeri Sambas dalam taun 1804. Sida babendar amat bamok, serta maioh bendar bulih dengah nyengkaum bansa Selakau enggau Dayak Lara ti diau nisau menoa nya.

Dua taun lepas nya, dalam taun 1806, iya ngulu ka bala besai Iban ari Saribas enggau Iban ari Skrang ngalah ka China di pasar Sengkawang. Leboh ka bamok tu, maioh bendar bansa China ti nan ka diri ngelaban ngena parang bingkok ti dikumbai “Tat” di bunoh sida. Barang sida ti ulih ngelari ka diri lalu lari ngagai nengeri Mentrado. Maioh mega sida ditangkap lalu dibai pulai, lalu turun sida bedau diau di menoa Saribas datai ka diatu.

Kategal maioh bendar munsoh udah lari ngagai menoa Mentrado leboh iya ka ngalah ka Sengkawang, OKP Dana Bayang lalu ngalah ka Mentrado dalam taun 1810, ngena perau pangayau 180 buah ari Saribas enggau Skrang. Leboh bamok ka sekali tu, nyau beratus-ratus china mati di dengah sida, lalu ka mimit aja tangkap olih sida lalu di bai sida pulai. Diatu turun sida mega agi mengkang diau di menoa Saribas enggau Skrang, lalu sakeda bisi mega dijual ngagai tuai Melayu.

Lima taun udah bekau ka ngalah ka China Mentrado, dalam taun 1815, OKP Dana Bayang ngulu ka lebih 100 buah perau pengayau Melayu enggau Iban ari Saribas serta Skrang mansang ngalah ka Nengeri Pontianak malam hari. Sida bamok babendar amat ngalah ka kandang nengeri. Sida besatup enggau bala munsoh ti tegap bendar, lalu munsoh agi nitih sida ka tasik ngena perau. Leboh kayau tu, manok sabong OKP Dana Bayang diulu ka Libau “Rentap” enggau bala iya ti badengah bulih sabuah perau pala Melayu Pontianak, serta bulih perapasan keris sabilah ti beulu ka mas.

Dalam taun 1820, OKP Dana Bayang mai bala ngalah ka bansa Selakau ti diau dalam garis menoa Sarawak semak Tanjong Datu. Leboh ka bamok tu, laban munsoh ka di bantu bala Iban Lundu di ketuai ka OK Temenggong Jugah, anak lelaki Nyambong ti udah pindah enggau bala iya ngagai endor nya. Kebuah Iban Lundu masok ka diri ngagai laya tu Iban Saribas enggau Dayak Selakau ari dendam lama antara Sebuyau enggau Saribas. Maioh dengah ulih bala sida OKP Dana Bayang leboh ka tu. Pia mega bala sida pan bisi mega kena bunoh munsoh dalam serang ka sekali tu.

Dalam taun 1825, OKP Dana Bayang ngalah ka Mempawah semak Sambas ke alai sida maioh bendar badengah ka orang berikan.

Serta udah pukas kayau tu, maioh bendar tuai-tuai Saribas baka sida OK Antau “Linggang Negeri” seduai menyadi iya OK Gun “Mangku Bumi” ari Rimbas ngalah ka Iban Sebuyau enggau bala ti enda besai, bebalas ka tegal Iban Sebuyau ti mantu bala balau ti barengkah ngelaban Iban Saribas ba menoa sida iya empu di Rimbas, Paku enggau Padeh.

Rambau benong pengachau tu baru nyadi dalam taun 1834 OKP Dana Bayang ngulu ka lebih 200 buah perau pengayau Iban ari Saribas enggau Skrang mansang ngalah ka Sambas. Leboh Kuta munsoh udah alah, OKP Dana Bayang lalu naban ka mariam siti ti ditinggal ka munsoh lari. Mariam tu ti digelar “Bujang Timpang Berang” lalu di bai sida pulai ka Saribas. Meriam tu mega ka lalu dikena OKP Nanang (anak OKP Dana Bayang) ninggang bala Libau “Rentap” leboh ka nan ngelaban Rajah Brooke di tuchong Bukit Sadok datai ka maia sida nurun nundok ka perintah dalam taun 1861.

Sama taun OKP Dana Bayang ti ngalah ka Sambas, OK Rabong ari Skrang ngayau ngalah ka Balau Iban enggau Melayu ba Bukit Banting di Batang Lingga bebalas ka bala Balau ti udah nyerang Iban Skrang di Nanga Skrang.

Dua tiga taun udah OK Rabong ngalah ka Balau Banting, Iban ari Undup enggau Iban Dau selalu bendar ngaga pengachau bekayau ka Iban ari Kumpang enggau Lemanak ke diau di sabelah ili Batang Ai. Ngasai ka diri ka selalu kena kachau tu, sida lalu minta tulong OKP Dana Bayang bebalas nyerang Iban Undup enggau Dau. Ketarubah iya OKP Dana Bayang bejako madah ka Iban Undup enggau Dau ukai munsoh iya, nya alai iya enggai ngemasok ka diri ngagai laya tu. Tang orang Kumpang, Lemanak enggau Skrang keras bendar minta tulong iya, laban enti semina sida iya aja, tentu munsoh tu enda ulih di alah ka sida. Sida mega suah udah alah laban munsoh tu dalam kandang lima taun ti ka udah.

OKP Dana Bayang lalu nanya sida sapa orang ti deka di padu ka sida nyadi tuai kayau ngelaban munsoh tu. Sida Tuai Iban Skrang, Lemanak enggau Kumpang sama nadai maioh jako lalu setuju ngasoh OKP Dana Bayang nyadi ka tuai kayau sida.

Ninga sida tak berat bendar minta bantu iya, OKP Dana Bayang pan sinu serta deka berunding ka peminta sida. Iya lalu madah ka sida, sabedau iya nyanggup ngulu ka sida ngayau, iya dulu deka nanya semua bala Manok Sabong iya dulu serta enggau semua Tuai Kayau bukai di Saribas laban deka nemu paneka sida enggau ngayau ka sekali tu.

Orang seruan ari Kumpang lalu diasoh OKP Dana Bayang nganti berita ari Manok Sabong serta enggau Tuai Kayau bukai dalam kandang dua tiga hari nya. Dalam kandang dua tiga hari nya, tuai sida ari Ulu Layar iya nya Unal “Bulan” enggau manok sabong iya Igoh apai Lamban enggau Uyu apai Ikum, datai madah ka sida sama setuju deka enggau ngayau. Linggir “Mali Lebu” ari Paku pan madah ka diri enggau bala manok sabong iya deka enggau, tang sida iya apin sempat mindah nama apin abis nugal umai bukit.

Serta OKP Dana Bayang udah nemu runding semua Tuai Kayau Saribas bukai enggau Manok Sabong sida ti setuju deka enggau ngalah ka Undup, iya pan lalu ngasoh bala seruan ari Kumpang nya pulai awak ka madah ngagai bala sida din, iya enggau bala manok sabong iya ari Padeh, Layar enggau Paku deka datai enda lama agi ka Kumpang.

OKP Dana Bayang pan lalu milih manok sabong iya empu nambah ka enggi sida Unal “Bulan” ari Ulu Layar enggau sida Linggir “Mali Lebu” ari Paku. Manok sabong iya ka di bai OKP Dana Bayang iya nya Sabok “Gila Berani”, Bedindang enggau menyadi iya Isik seduai Senaang. Manok sabong Unal “Bulan” ari Ulu Layar nya Igoh Apai Lamban seduai Uyu apai Ikom. Nyadi manok sabong Linggir “Mali Lebu” ka enggau ngayau tu di ketuai ka Enchana “Letan Pulas Mas”, Birai “Jawa Jambai”, Minggat Apai Runai enggau Chulo “Tarang Bulan”.

Leboh semua pengawa ke nyendia ka kayau udah tembu diator, sida OKP Dana Bayang enggau beratus-ratus bala iya lalu angkat ari Padeh. Sida melunggang ka Skrang lalu bemalam samalam ba Nanga Lemanak. Hari siti sida lalu mupok bejalai ka Kumpang. Leboh sida datai din, sida meda nyau beribu-ribu bala endang udah nganti penatai sida. Penatai bala sida nya tadi ari Skrang, Seramat, Lemanak enggau Belambang.

Malam nya leboh ka berandau enggau tuai-tuai bukai, OKP Dana lalu nanya ngagai sida berapa penyampau sida ari Skrang, Lemanak, Saramat, Belambang enggau Kumpang udah sedia deka enggau bala. Sida madah ka iya bisi dua tiga ribu iko ti endang udah datai, lalu enda temu pemaioh ti agi deka datai. Udah ninga tu OKP Dana Bayang nanya sida baru sekali ka sida amat milih iya ngulu ka bala. Tuai sida lalu nyaut endang agi nitih ka semaia endang siga ngambi iya jadi ka tuai ngulu ka bala. OKP Bayang pan lalu madah ka sida enda ngasoh sida angkat dulu, laban agi nganti penatai Linggir “Mali Lebu” enggau bala iya ari Paku ka agi nembu ka tugal umai sida. Nya alai sida Kumpang kiroh bendar ngintu bala pengayau dalam kandang dua minggu leboh ka nganti penatai Linggir “Mali Lebu” enggau bala iya ari Batang Paku.

Dua minggu lepas nya, baru bala Linggir “Mali Lebu” datai. Malam nya OKP Dana Bayang pan lalu mai orang barengkah baum ka pasal kayau. Dalam aum nya, iya lalu nusoi ngagai Linggir “Mali Lebu” pasal pemutus runding sida Batang Lupar ti udah niri ka iya jadi ka tuai ngulu ka bala ngalah ka Undup. Linggir “Mali Lebu” pan lalu setuju serta madah ka atur nya betul bendar laban ko iya, ” nadai tuai bukai ditu bisi lebih agi ari nuan ti udah lama serta udah suah agi ngulu ka bala ngerja pengawa besai baka tu. Enti ukai nuan, OKP Dana “Bayang”, di padu nyadi ka tuai bala kitai, aku enggau bala manok sabong aku nyangka enda enggau bebala tang lalu pulai ngintu pengawa umai di menoa din,” ko Linggir “Mali Lebu” nampong jako iya tadi.

Udah ninga saut Linggir “Mali Lebu” nya tadi, OKP Dana “Bayang” pan lantang bendar ati. Iya pan lalu madah ngagai semua tuai bukai utai ti enda tau enda di kerja dulu dikena nyandia ka Kayau. Iya ngatur dua iko ari tuai ka dia ngiga tambak burong (ka deka di bai sida ngayau jadi ka tanda burong sida). Tumu pagi hari siti, seduai pan lalu nurun ngiga tambak burong. Apin lama udah nurun, siko ari seduai lalu ninga Ketupong Kanan, lalu tuai ka siko agi lalu ninga Beragai Kiba.

Udah nya, pagi siti OKP Dana Bayang agi ngasoh tuai dua iko bejalai ka babas ngiga tambak burung baru nambah iya ka udah. Siko ari seduai iya ninga Pangkas Kanan, lalu enchabut anak kayu ka tambak burong. Iya ka siko agi lalu ninga Embuas Kiba. Udah tembu nya tadi, seduai lalu bejalai sama ngiga tambak Kelabu Papau Kiba.

Lalu enggau tambak burung nya tadi, OKP Dana Bayang lalu madah ngagai bala tuai ka dia, “laban kitai bisi semua tambak burong tu, nama-nama pan burong bukai bisi didinga kitai leboh kitai mansang nurun ngayau ila, nadai tau pulai ka pengachau kitai,” ko iya.

Malam udah tembu pengawa ngiga tambak burung, sida pan lalu ngadu ka piring ading dikena sida ngangau ka Petara awak ka sida ulih nulong ngalah ka munsoh enggau lantang. Udah tembu pengawa miring, lemambang dua iko lalu diasoh barenong kayau ngangau ka orang Panggau Libau enggau Gelong datai nulong serta enggau sida iya ngayau ngalah ka munsoh.

Udah tembu miring, dua iko lemambang lalu diasoh ngangau ka renong kayau awak ka ngasoh orang ka berani ari Panggau Libau enggau Gelong datai nulong sida bamok ngalah ka munsoh. Lemambang ka barenong tu tadi endang mangkang mahligai pengaroh enggau senjata ti udah diengkah dalam mahligai awak ka orang ka bujang berani ari Panggau Libau enggau Gelong nyumpah samoa utai ngambi ka iya pulai bisa ti lalu tau nulong sida. Leboh lemambang udah badu barenong dinihari nya, sida pan lalu diberi orang ka bempu rumah makai pagi. Tembu makai, tuai rumah pan lalu ngempuru ka orang baum ba ruai iya laban deka nanya ka mimpi siko-siko malam nya.

Udah samoa bala penguang nusoi mimpi diri, OKP Dana Bayang pan lalu nanya ka mimpi tuai rumah empu. Saut tuai rumah, “mimpi aku malam nya asai ka munoh kaban beruang, udah nya aku lalu malik serta meda maioh bendar bangkai kaban beruang mati nyau baka garing kiba-kanan. Udah nya mega, aku asai ka ngalah ka kaban nyumboh, lalu leboh aku malik udah nya, peda aku bangkai nyumboh nyau baka garing sabelah tanah ngelingi aku dia.”

Udah ninga ka mimpi Tuai rumah nya tadi OKP Dana Bayang pan lalu ngasoh orang ti manah buah mimpi mupok nurun mansang nyerang enggau iya. Leboh sida bejalai nengah jalai nuju Undop, OKP Dana Bayang ngasoh bala ngetu enda lama, laban deka barengkah ngusok ka burong ka didinga sida serantau jalai sepagi nya (reti ngusok tu kena bebasa ka burong). Udah tembu ngusok, sida lalu majak ka pejalai sida, sampai ka sida datai ba endor sabengkah ti endor sida ngetu tiga malam beburong ka nyawa Ketupong kanan ka didinga leboh ka ngambi tambak burong nya suba. Tembu tiga malam sida beburong ba endor nya, sida lalu majak ka pejalai sida baru sampai ngagai tengah hari ka endor sida ngetu samalam ngibun tambak burong Beragai Kiba.

Tumu pagi siti, OKP Dana Bayang lalu ngerah bala bejalai baru ngagai antara menua enggau munsoh. Ba rantu jalai sida lalu ngetu samalam baru laban deka ngibun tambak burong Pangkas kiba. Hari siti sida lalu bejalai baru, lalu datai ba menoa enggau munsoh tengah hari rapas. Dia sida lalu bedampa awak ka bisi endor sida diau. Leboh orang ka biak agi tu benong bedampa, OKP Dana Bayang lalu ngasoh Sabuk “Gila Berani” seduai Bedindang ngulu ka bala dua belas iko bejalai ka dalam babas ngikup ka bala pengayau sabelah menoa nya dia ngagai jauh malam enggai ka dilanggar munsoh enggau ngenyit.

Pulai sida ngikup malam nya, OKP Dana Bayang lalu nanya ka berita sida. Bedindang lalu madah ka bala sida bejalai begadai-gadai dalam babas enda nengah arong jalai, lalu masok ngagai menoa munsoh. Sakeda sida niki puchok mengeris awak ka tampak endor sida meda ka endor rumah munsoh. Sida meda rumah panjai munsoh ari jauh. Udah tembu berati ka gaya rumah munsoh nya, sida lalu mulai ka diri ngagai tugong bala malam nya.

OKP Dana Bayang lalu nanya Bedindang, “enti kitai angkat tumu ari tu, ni ka maia kitai datai nuntong ba rumah munsoh?”. Bedindang lalu madah ka OKP Dana Bayang “Kitai tentu ulih datai din apin tengah hari. Kitai tau berapi dulu pagi nya enti kitai deka datai din maia tengah hari rapas.”

Ninga nya OKP Dana Bayang lalu ngerah bala berapi udah tengah malam awak ka ulih bakejang ari nya rerak tawas. Iya mega madah ka ngagai samoa tuai-tuai bala, iya ukai semina deka ngalah ka sabuah rumah munsoh aja, tang samoa rumah panjai munsoh sekayu Batang Undup. “Nya alai udah kitai ngalah ka sabuah rumah panjai munsoh ka tarubah iya tu, kitai lalu bepalan ari rumah nya ngalah ka rumah panjai bukai,” ko iya madah ka sida.

Tumu pagi siti sida lalu angkat bejalai nuju antara menoa ka semak rumah munsoh nya tadi. Datai sida ba pun kayu mengeris ti endor bala pematau ngila ka gaya rumah panjai munsoh dulu agi ari nya, OKP Dana Bayang lalu mai bala diau dia malam nya awak ka berandau ka atur deka negah munsoh.

Lemai nya, OKP Dana Bayang lalu ngangau bala pamesai tuai kayau iya baum. Dalam aum nya, iya ngasoh Sabuk “Gila Berani” seduai Bedindang mai dua iko bala bukai nyepai pemindah munsoh semak ka agi. Sakeda pengayau bukau diasoh iya jaga ngelingi dampa arau sida enggai ka dialah ka munsoh enda ngadang.

Pagi siti, Sabuk “Gila Berani” seduai Bedindang enggau dua iko sida bukai lalu nyau nurun mansang nyepai bala munsoh. Sida empat pulai ngagai dampa arau endang udah jauh lemai. Lemai nya OKP Dana Bayang lalu nanya rita sida empat ka nengkilun ka pendiau munsoh. Ko Bedindang, sida bejalai nengah jalai tang nadai batemu enggau munsoh. Semadi leboh sida udah datai nyau semak bendar enggau rumah panjai munsoh, sida bisi ngemata ka ari puchok kayu. Pemanjai rumah dipeda sida bisi tiga-puloh pintu.

Ninga rita nya, OKP Dana Bayang lalu ngasoh bala pengayau mengkang diau dia sahari da agi. Malam nya iya lalu ngerah bala tumu tindok ngiga mimpi. Bala ti ngambi kayu kena berapi diasoh ngambi kayu ti udah chukup mati serta rangkai bendar awak ka enda berasap enti dikena berapi laban sida udah semak bendar ari rumah munsoh.

Hari siti leboh bala pengayau ke biak nyau ngambi kayu api ka babas, tuai-tuai kayau serta enggau bala pengayau ti endang tau dikarap landik serta berani, lalu berunding ngiga jalai dikena ngalah ka rumah panjai munsoh nya. Sida ke berandau dia diulu ka OKP Dana Bayang empu, ditangkan ka Linggir “Mali Lebu” enggau Unal “Bulan”. Semua atur udah putus magang ba aum malam nya, semina nganti ka barengkah agi. Dalam aum nya, OKP Dana Bayang mega nanya ka pemaioh rumah munsoh dalam Batang Undup ngagai orang Kumpang. Sida madah ka ngagai iya rumah munsoh di Batang Undup maioh lalu sakeda nya bisi udah dialah ka enggau jalai Kayau Anak.

Ninga rita tu, OKP Dana Bayang lalu nerang ngagai sida ari Kumpang, ko iya “Laban aku udah minta bantu ari semua tuai kayau ari Batang Saribas ti berani serta bisi bendar paneleba dalam pengawa tu, aku enggai ngetu ngapa ngalah serta nyerang rumah munsoh datai ka semua sida alah magang nitih ka penembu ati aku.” Jako OKP Dana tu tadi ngenyit ka ati tuai sida ari Kumpang, laban ko ati sida iya semina ngalah ka rumah sabuah nya aja.

Udah badu makai malam nya, OKP Dana Bayang lalu ngerah semua tuai kayau nusoi mimpi diri malam nya ba moa maioh. Udah abis bala maioh betusoi ka mimpi diri, OKP Dana Bayang lalu nanya ka mimpi bala tuai kayau ari Padeh, Paku enggau Layar. Sida bela madah ka ngagai iya , semua lantang magang dalam mimpi.

Udah ninga ka semua utai tu, OKP Dana lalu bejako enda ngasoh sida ka jai mimpi enggau bebala, tang pulai ngagai rumah diri empu. Iya lalu ngatur tuai-tuai kayau nyengkaum Linggir “Mali Lebu” seduai Unal “Bulan” ngulu ka bala mansang nyerang nengah tiga batang jalai baka tu:

1. Tuai kayau iya empu ari Padeh bejalai ari tengah jalai.
2. Manok sabong Linggir “Mali Lebu” nengah jalai kanan.
3. Manok sabong Unal “Bulan” nengah jalai ari kiba.

Manok sabong orang ari Kumpang, Skrang, Lemanak, Seremat enggau Belembang diasoh diasoh bejalai ari belakang sida tu magang bebagi-bagi.

Sabuk “Gila Berani” seduai Bedindang bejalai dulu ka bala ba jalai tengah. OKP Dana nyemetak bendar jako madah ka bala ti ngena jalai tengah enda sekali-kali diasoh masok ka dalam rumah munsoh. Sida semina ngipa munsoh ti pansut ari rumah.

Serta hari terbak tawas, benong munsoh makai pagi, sida lalu ngenyit ngelanggar rumah munsoh. Dalam serang tu, maioh bendar bala munsoh parai, semina mimit aja ti bakal. Barang ti ulih lari, lalu ngelari ka diri. Perapasan maioh bendar ulih sida, baka tajau lama, bedil temaga, bendai enggau setawak.

Udah OKP Dana ditusoi ka Bedindang pasal serang sida tu, iya lalu ngasoh sida nguan rumah nya serta lalu dijaga enggau tegap awak ka likun ari langgar munsoh. Bedindang, Sabuk “Gila Berani”, Isik & Senaang lalu nyau ngulu ka manok sabong bukai bejalai nuju antara menoa nya enggau rumah panjai sabuah agi berati ka bala munsoh enggai ka bala munsoh ngenyit malas lalu ngelanggar bala sida. Sida bukai ti tinggal lalu napok perapasan sida sabelah babas ngelinggi rumah ti udah alah lalu diwan sida jadi ka palan.

Udah badu babela makai lemai lemai nya, OKP Dana lalu ngagau tuai-tuai kayau serta tuai bala bukai baum ba palan iya dalam rumah panjai nya. Sida bukai ka enda enggau baum diasoh iya jaga rumah ngelinggi nya dia. Dalam aum serak tu, iya ngasoh semua manok sabong enggau bala bukai sama ngingat ka jalai enggau akal sida ka nyerang lalu ngalah ka rumah panjai nya tadi lalu ngena atur nya nyerang rumah bukai ka deka diserang sida dia. OKP Dana lalu ngasoh Sabuk seduai Bedindang bejalai serta nengkilun ka pendiau munsoh hari siti, apin sida barengkah nyerang.

Datai ba maia hari siti Sabuk seduai Bedindang lalu mai bala dua tiga iko nengkilun ka bala munsoh ba rumah panjai ka ari ulu sida. Datai sida dia sida nadai meda orang siko laban orang dia udah lari dua tiga hari dulu ari nya.

Leboh sida pulai, sida lalu nusoi berita sida ka matau munsoh nya ngagai OKP Dana. Ninga rumah panjai munsoh nya nadai orang agi, iya pan lalu ngerah bala ngalah ka rumah nya pagi siti. Sida angkat ari nya nyerumba rerak tawas. Atur sida bejalai baka atur ka pejalai ka dulu agi ari nya. Leboh ka belangar tu, ka dua iko aja munsoh dibunoh sida. Rumah panjai tu alah enggau mudah laban munsoh udah ninggal ka rumah nya dulu ari nya. Bala sida lalu nguan rumah nya.

Leboh sida udah nguan rumah nya, bala manok sabong lalu belatur nyaga rumah nya. Sabuk seduai Bedindang lalu bejalai jauh ka dalam babas berati ka bala munsoh enggai ka bisi nginau sabelah menoa nya lalu ngenyit nyerang bala sida. Leboh seduai rembus ba umai orang, seduai lalu batemu enggau dua iko orang melaki bini ti mansang deka mantu munsoh. Leboh tapeda ka seduai, bini lelaki nya nyau getar-getar takut. Sabuk seduai Bedindang lalu nanya ka penunga seduai. Seduai melaki bini madah ka diri datai ari Merakai, Kalimantan Indonesia laban bisi ninga berita Rumah Jarup di Ulu Undup dialah ka orang Kumpang. Sabuk seduai Bedindang pan bisi ninga berita nya lalu deka nemu berita nya terang agi ari orang ka empu rumah nya. Orang melaki bini nya tadi lalu madah ka ngagai Sabuk seduai Bedindang, orang ti agi ulih ngelari ka diri ari langgar munsoh lalu lari ngagai rumah panjai Suring di Ulu Undup lalu diau serta belindung dia. Sida mega udah minta bantu bala Kantu ari Merakai nulong sida nan ka rumah ngelaban penyerang ari Kumpang.

Udah ninga semua rita tu, Bedindang seduai Sabuk pan madah ka diri deka pulai lengkas dulu awak ka ulih mantu bala Sureng nan ka diri ari langgar munsoh. Seduai pan lalu mulai ka diri ngagai bala sida lalu nusoi rita ti ulih seduai ngagai OKP Dana.

Udah ninga berita tu OKP Dana lalu bejako nunga tuai orang Kumpang, lalu nanya ka runding sida pasal ka deka ngalah ka rumah Sureng. Sida bela nyaut enda ulih meri penemu laban udah arap enggau penuh ka OKP Dana serta samua tuai bukai ari Saribas enggau bala manok sabong sida nulong munas serta ngalah ka sida ti selalu nyerang orang Kumpang dalam kandang empat lima taun ti udah lalu.

OKP Dana pan lalu nanya ka tuai sida ari Lemanak, Skrang, Seremat enggau Belembang pasal ti deka ngalah ka rumag suring. Sida bela nyaut madah ka diri endang nitih ka kayau OKP Dana ngagai sebarang kayau ti diulu ka iya.

Udah mending ka runding tuai kayau ari Batang Lupar, OKP Dana lalu nanya ka penemu Linggir “Mali Lebu” ari Paku serta Unal “Bulan” ari Layar. Linggir seduai Unal lalu mansut ka jako. “Kami tu ga udah nitih ka kayau serta mantu bala OKP Dana ngelaban Undup, Kami duai enggai ninggal ka nuan sa-agi-agi nuan ngerja pengawa.”

Udah ninga runding bala maioh, OKP Dana pan lalu bejako, “Enti semua runding udah sagala munyi nya, kitai patut majak ka pengawa ti deka ngalah ka Iban Undup. Kitai anang kakang ngulu ka bala ngelanggar rumah Sureng, ti endor bala munsoh udah nguta diri ari bantu bala Kantu enggau orang bukai ari menoa Indonesia.”

Malam nya OKP Dana ngasoh sakeda bala manok sabong iya bejaga jauh dalam babas ngelingi endor nya enggai ka bala munsoh bisi belalai matau bala sida. Iya mega ngelalau bala iya enda ngasoh munoh bala munsoh ti bisi meda bala munsoh dalam babas. Sida ka bejaga tu diulu ka Sabuk “Gila Berang seduai Uyu Apai Ikum. Sakeda sida ngaga kuta ngelinggi nya kena nagang pemudah tempoh munsoh enti munsoh bisi datai. Sida mega lalu nan beribu-ribu tukak digaga ari batang nibong serta buloh temiang.

Hari siti Bedindang seduai Uyu Apai Ikum bejalai ngagai umai orang ti endor Sabuk seduai iya betemu enggau munsoh melaki bini dua hari dulu agi ari nya. Kebuah seduai bejalai kia nyangka munsoh enggau bini iya mengkang agi dia nganti bala Kantu bukai ti datai mantu bala Sureng di Ulu Undup. Datai dia seduai nadai agi meda munsoh nya dia. Nya alai seduai lalu majak ka pejalai seduai jauh agi sampai ngagai seduai rembus ba pendai semak rumah panjai Sureng.

Leboh seduai benong bejalai sabelah menoa semak rumah munsoh nya, seduai lalu tapeda ka orang dua iko benong mungga kayu api ba tebing sungai. Seduai lalu nanya ka penatai sida tak bebala maioh baka nya. Sida madah ka Bedindang seduai Uyu, sida datai ari Merakai sama enggau pangan sida ti benong mandi dibaroh ba sungai. Bedindang lalu nanya ka pemaioh sida udah datai nguang Sureng. Siko ari munsoh nya tadi lalu lalu madah ka orang ari maioh buak rumah di Merakai bisi datai tiap-tiap hari nulong nan ka rumah Sureng.

Uyu pan lalu nanya, sekali ka bala ari Merakai enggau bala Sureng semina deka nan ka rumah ari langgar munsoh aja tauka nyerang munsoh dulu. Orangnya lalu bejako madah ka semua parengka ti dikena bamok udah tembu magang, lalu Sureng deka ngulu ka bala nempoh bala munsoh ba palan munsoh empu pagi pagila. Ninga tu Uyu seduai Bedindang pan lalu madah ka diri deka mandi enggau pangan sida ba pendai di ili dia sabedau niki ka rumah Sureng. Seduai lalu beguai-guai mulai ka diri ngagai bala sida.

Udah datai ba langkau palan, OKP Dana enggau bala tuai bukai lalu ngulu Uyu seduai Bedindang nanya ka berita seduai ti udah pulai matau munsoh. Seduai lalu nerang ka sida pasal pejalai seduai ke datai ba pendai rumah Sureng ka endor seduai betemu serta berandau enggau orang dua iko ti madah ka seduai iya bala Sureng dibantu bala penguang Kantu deka datai nyerang sida pagila lalu enda nan di rumah Sureng empu. “Nya alai kitai enda tau enda nyendia ka diri ngelanggar sida ba rumah sida empu tauka kitai nan ditu pagila,” ko Uyu nusoi berita ngagai OKP Dana enggau tuai-tuai ke bisi dia.

Nya alai tak sahari-hari nya sida majak nguta palan sida enggau chukop tegap serta lalu nambah ka pemaioh tukak ditanam sida ba samoa endor ari luar kuta sida.

Udah badu makai lemai nya, OKP Dana lalu ngangau ka baum baru ba endor iya, awak ka mutus ka semua kerja ka nyendia ka diri. Dalam aum nya iya ngator lapan iko manok sabong ti dikarap ka iya bendar diulu ka Bedindang seduai Uyu negah bala munsoh enggau ngenyit, tang nganti kira dua puloh iko udah masok kandang antara enggau rumah panjai sida iya empu. Pia mega iya ngelalau bala maioh enda ngasoh sida ngamok dulu, sebedau sida ti diasoh ngipa negah munsoh, baik ka munsoh nitih ka sida tau ka enda.

Tumu pagi siti Uyu, Bedindang sama enggau Isik seduai Senaang enggau orang bukai ti udah diator nyempulang seduai lalu nyau ngagai endor sida ti negah, enda tentu jauh ari endor kuta sida. Udah tembu sida belatur, sida lalu barengkah ngeram ka ipa ba tisau jalai. Enda bangat lama udah sida ngeram ka ipa, nya baru bala besai munsoh datai mansa jalai sanentang sida ka ngeram ka ipa. Sida lalu angkat ari ti ngipa lalu negah bala munsoh serta nachah ka munsoh ti udu bendar tekenyit. Sida udu bendar bamok enggau panjong-panjong. Leboh ninga panjong sida, bala ka tinggal ba kuta lalu ngadang serta ngatur diri ba endor ti manah, nan ka rumah enggau kuta ari dalam pagar kuta. Sida bamok udu bendar.

Bala munsoh nyau enda nemu utai asai nya agi diansak ka bala pengipa. Enti sida surut, sida dijamah orang ka ba kuta. Sida nyau baka rauh, lebih agi leboh sida kena tebak tukak apin sida datai ba senentang rumah panjai ti udah tegap bendar kena kuta sida OKP Dana. Bala munsoh maioh bendar parai lalu iya ka bakal mega ditangkap sida.

Udah pukas sida ka bamok tu tadi, OKP Dana lalu meda ka pemaioh bala iya ka bisi bakal. Bala sida ari Kumpang enggau Belambang bisi parai. Tang laban sida ka bamok tu tumu tembu, nya alai bisi bendar hari sida numbak ka bangkai bala sida ti bisi parai udah tengah hari nya.

Nyau udah makai lemai nya, OKP Dana lalu ngangau ka baum baru. Dalam aum tu iya bejako mai bala ngalah ka rumah Sureng tumu pagi siti. Iya lalu ngasoh semua manok sabong ti landik serta taleba nyendia ka diri lamai nya. Orang bukai ka enda ulih enggau nyerang diasoh nyaga kuta enggau orang ka bakal. Sabuk lalu bejako madah ka nya bebuai dadu bendar ninggal ka sida baka nya laban enti munsoh datai baru nyerang kuta tu, tentu sida ka bakal serta sida bukai enda ulih enggau nyerang tu nadai penyadi. Tang ko OKP Dana, “munsoh tentu enda datai agi udah ka rusak bendar kena alah ka kitai pagi tadi. Udah sida alah bendar baka nya, samoa penguang Sureng tentu pulai ngagai menoa sida empu di Kalimantan Barat.”

OKP Dana lalu bejako mai bala ngelanggar rumah munsoh ngintai ka maia sida makai pagi rerak tawas. Malam nya semua sida diasoh nat ka diri enggau chukop serta tindok tumu ngintai ka mimpi. Agi dinihari dalam, OKP Dana lalu nanya ka mimpi bala sida. Iya lalu ngasoh bala sida ka enda manah mimpi tinggal lalu nyaga bala sida ti bakal enggau sida ti enda enggau tadi. Iya samina mai semua sida ti manah mimpi enggau iya.

Leboh sida datai ba rumah panjai Sureng leboh maia rerak tawas, OKP Dana lalu ngulu ka bala iya masok ngagai rumah Sureng. Iya lalu dientudi ka Linggir “Mali Lebu” seduai Unal “Bulan”. Leboh sida bejalai nengah ruai nyandang nyabur ba jari sida, sida nemu ka dua-tiga iko aja munsoh bisi diau ba rumah nya. Leboh bamok sida nyau ka munoh semua munsoh enggau nadai penangul. Sida lalu pulai ngagai palan sida enggau lantang laban nadai bisi siko bakal. Sida bulih bendar tajau lama, setawak, bendai, chapak lama enggau utai bukai jadi ka perapasan dibai sida pulai.

Kena nanda pamenang iya ti ngalah ka Undop, OKP Dana Bayang semina mai benda Guchi sigi ti agi mengkang disimpan peturun iya di Lubok Nibong, Baram, nambah ka benda menaga enggau benda rusa. Linggir “Mali Lebu” beperapasan ka benda menaga sigi ti diintu bala ichit iya di Matop, Paku. Bala manok sabong ti bukai sama bela bulih perapasan magang, baka tajau lama enggau bedil temaga enggau parengka temaga bukai.

Udah bekau tasah diserang bala OKP Dana Bayang enggau orang ari Kumpang, orang Undup lalu lari ngagai dua bengkah bagi menoa. Maioh agi sida ngagai Salimbau dalam Kalimantan Barat, lalu ti bukai nya lari ngagai Ulu Lingga lalu diau enggau bala Balau.

Nyau kelama udah nya menya, leboh Mr. Brereton megai kubau Skrang, sida diasoh pulai baru ka Undop, tang leboh sida datai dia sida nemu menoa Skrang Ili udah diwan orang ari Skrang, lalu di Ulu Undop udah diwan orang Kumpang.

Dalam taun 1843 (11/6/43) leboh Sir James Brooke seduai Admiral Keppel ngalah ka Saribas ba Nanga Padeh. Udah ti alah belanggar di Nanga Padeh tu nya ngujong ka OKP Dana Bayang enggau Linggir “Mali Lebu” dikangau ka Rajah James Brooke ngagai kapal iya di Tanjong Sabuloh dalam kandang Saribas Ili ngasoh seduai iya nyerah ka diri nundok ka Parintah. Tang iya enggai nyain surat ti ngasoh iya nyerah laban iya agi enggai nundok tau ka ngelala Perintah ti di pegai Rajah Brooke. Lalu maia nya mega Rajah James Brooke bisi nulis pasal seduai ti munyi tu:

“Orang Kaya Pemancha Dana Bayang ari Saribas diatu bisi lalu ngagai aku …iya tu orang ti pemadu iya diketakut ka serta mega mutus berani. Iya enda besai gamal lalu pendiau iya likun serta umur iya nyau tuai. Lengan kanan iya singkong lalu tuboh iya penuh laban litan abi pantap serta abi tumbok sangkoh. Aku deka bendar berati serta merening gamal iya, lalu ari semua tuai bukai dalam batang ai nya, ba runding aku, iya siko tuai ti pemadu pandai serta lurus ngiring bala anembiak iya.”

“Siko agi tuai bansa asal ti sama bisi lalu ngagai kapal aku iya nya Linggir. Tubuh iya baruh, manah bendar di peda. Mata iya gining-gining baka perening mata ular bisa leboh iya duduk atas deck kapal. Aku enggai badu merening ulah iya ti likun laban ari perening mata iya ti tajam bisi pangering, pemintar lalu nemu beparagam ka utai dudi hari ila. Silak mata iya mit serta tajam indah baka jarum kompas.”

Nyau lama udah lepas ngalah ka Undop, dalam taun 1853, Iban ti diau di Layar, Padeh enggau Paku Ili, bisi nanggok buntal ba Tanjong Kauk ari ulu Nanga Rimbas dalam Batang Saribas. Tiap-tiap taun ba sanentang nya endang maia buntal ngempas ka diri deka batelu. Nyau beratus-ratus bala Iban bebuntal dia nyengkaum OKP Dana Bayang enggau kaban iya.

Sakali benong orang maioh benong betangguk ngena perau ba sungai nya, peda datai bala Balau mudik ai Saribas ngena perau pengayau ngalah ka sida ti benong berikan. Bala balau endang nemu sanentang nya endang endor orang betanggok maia nya taun. Sida lalu bamok enggau munsoh besenjata ka sengayuh laban maioh sida nadai mai duku, semina mai lungga kena nasa buntal. Bisi sida nutuk munsoh ngena turus enggau sebarang utai ti di kemisi ka sida di dalam perau. Ba ke bamok tu maioh bendar perau sida karam lalu sida maioh lemas tauka parai dibunoh munsoh.

Ari beratus orang ka berikan dia, semina OKP Dana enggau sakeda sida bukai ulih nan ka diri ngena duku ti enda panjai ti dikena sida nasa buntal. Udah semua kaban belayan iya nyengkaum Isik seduai Senaang parai lemas enggau kena bunoh, OKP Dana Bayang pan lalu terjun nyemerai ka tebing deka ngidup ka diri. Iya lalu dititih ka munsoh betubuh sabelas iko ti babendar amat nguji deka nangkap iya. Leboh iya datai di tebing, iya lalu mutar ngelaban munsoh ngena duku mit ti mengkang digengam iya. Sida babendar amat ngelaban OKP Dana, tang munsoh tak enda tebakal ka iya, laban kulit iya kebal. Nyau kelama sida udah bamok, bala Balau pan nyau mansang lembut salembut. Nyepi diri enda telaban ka iya sida lalu lari ninggal ka iya. Udah sida abis lari, OKP Dana pan lalu luput laban udah kelalu ikak.

Iya dani tumu pagi siti lalu mupok bejalai nengah pala pantai nebing ai Saribas datai ka iya batemu enggau Melayu siko ti endang taleba bendar enggau iya. Iya pan lalu pinta anjong Melayu nya pulai ngagai rumah sida di Padeh.

Lepas bala Balau ti udah bebunuh ka orang berikan di Tanjong Kauk, OKP Dana Bayang lalu ngangau ka Linggir “Mali Lebu” ari Paku seduai Unal “Bulan” ari Layar ngagai rumah iya di Padeh. Iya mai seduai nya berunding deka mai bala besai ngalah ka Balau ba Bukit Banting nya empu. OKP Dana Bayang nanya seduai iya enti seduai sama setuju mantu iya enggau bala iya. Linggir “Mali Lebu” seduai Unal “Bulan” bela madah ka diri sama setuju laban deka bebalas ka pemati orang maioh ka dibunuh bala Balau di Tanjong Kauk.

Tang enda mukai-mukai, leboh sida benong nyendia ka kayau tu, OKP Dana Bayang kena jangkit penyakit Tampok Buah lalu parai ditambah ka penyakit bukai dalam taun 1854 lalu ditumbak ka di pendam Terusu dalam Padeh. Anak iya ti benama Umpu mega parai sama kena jangkit penyakit dalam taun nya.

Udah parai OKP Dana Bayang, iya lalu diganti anak lelaki iya ti benama Aji tauka Saji nyadi ka tuai di Padeh enggau Ulu Layar nyengkaum Spak. Taja Aji biak agi ari Nanang seduai Luyoh, tang iya berani serta landik agi megai orang ari aka tuai iya dua iko nya. Iya nyadi tuai enda lama, engka empat taun aja, laban iya parai leboh ka betachah enggau munsoh ba Sungai Langit dalam bulan April, 1858. Iya lalu diganti menyadi iya OKP Nanang jadi ka tuai.

OKP Nanang mai bala iya nundok ka perintah Brooke dalam taun 1861 ba kaki Bukit Sadok udah Raja James Brooke besemaia mayar 400 igi rusa dikena nundok serta bebaik. Iya lalu dibai Perintah Raja Brooke ngalah ka Kayan di ulu Rajang dalam taun 1863. Laban pemerani iya serta enggau penaluk iya ka perintah Raja Brooke, iya diberi Rajah Brooke pangkat Orang Kaya Pemancha ba moa tuai-tuai bukai ke begempuru di Fort Alice, Simanggang dalam taun 1886.

Jerita Antu Kara

Nyadi dulu kalia bisi orang siko ti benama Assan. Iya tu udah bebini, jadi enggau indu siko serta beranak lelaki siko ke benama Salau.

Assan seduai bini iya gaga bendar ati meda diri bisi anak lelaki siko ke sigat sereta sikar dalam samoa main enggau pengawa. Nya alai endang kenyau ari mit iya arap ka Salau tau nyadi orang ke menyana ka ganti iya nampong bilik nampong pemaik sereta nyaga reta tengkira, enti leboh nyau datai ba maia seduai bini nyau udah nadai agi jemah ila.

Nyadu leboh maia Salau nyau udah bujang, iya selalu belajar ke samoa pengawa ti tau pulai ke pengidup ti menyana kena ngidup ka diri empu. Salau tu anembiak ke rajin bendar, serta enggau liat ati ngereja pengawa ti mar sereta pedis dikereja.

Nyadi skali leboh hari agi tumu pagi, dia Assan nurun bejalai ngagai tembawai buah tuai ti enda berapa jauh ari rumah sida empu. Nyau puas iya ke malik kiba malik ka kanan merening sereta nengkadah puchok buah, dia iya bisi tepeda ka manyi inggap sereta nepan ba puchok kara. Puchok kara nya enda berapa tinggi iga, tang rakah bendar dan. Assan lalu besindang pun kara enggai ka bisi orang bukai deka ngambi manyi nya. Udah tembu iya ke besindang pun kara iya lalu mulai ka diri ka rumah. Datai di rumah iya lalu madah ka diri deka mai Salau muar manyi lemai nya ngagai bini iya.

Nyadi leboh maia hari nyau penumbas iya alai nurun, seduai iya lalu mupok mega bejalai, mansang deka muar manyi nya tadi. Datai seduai ba pun kara, dia Salau lalu begaga ka tangga Antu nya. Salau pan lalu beregkah maji enggau natok batang kara. Iya pan lalu manggai ba pun dan, udah nya Salau lalu nurun ka baroh ka baru. Samoa utai enggau perenka ti deka dikena muar manyi baka tali panjai, rintong enggau samilu endang udah sedia magang. Baka nya mega sempun kulit engkajang ti endang udah rangkai pan nyau udah rembun-rembun udah ditungkun ka apai iya Assan.

Udah tembu ngeruku indah, dia Salu pan lalu mupok niki. Dia iya ngambi tali enggau samoa utai bukai ti dikena, lalu ditanchang ka iya ba punggong iya magang. Udah nya iya lalu mansang bejalai gadai-gadai serta ngeradayau niki ngagai dan ti endor manyi nepan ba puchok kara.

Leboh iya ke berenkah niki tadi malam endang udah jauh, lalu panchar bulan pan enda berapa terang, laban bulan baru ka tumboh, tambah agi laban bisi moahari, ujan bisi beberis sereta mesi-mesi mimit. Nya kabuah sempun Salau enda berapa maioh bara lalu enggai merumum.

Leboh iya baru datai ba pun kara ke alai manyi nya nepan, dinga iya daun kara nyau gerisih. Puchok kara lalu berenyang tiga kali. Meda utai bakanya, dia bulu iya lalu tumboh, bulu pegu lalu nyeregu, tapak kaki lalu pegeremai asai sepi iya, laban kelalu takut sereta geli bendar ati. Iya lalu enda engkebut, agi engketut ba pun dan kara, agi nganti utai ti ngasoh puchok kara nya berenyang ayan.

Nyau kelama udah Salau ke ngetu baka puyu mabok amboh, ngenong baka empelekong mabok keroh, Antu kara pan lalu ayan lalu nangkap Salau. Nadai daya meh tudah Salu tu tadi, laban ba puchok kayu nadai jalai tudah tuai ngelaban. Antu kara tu tadi lalu nelan iya segala-gala. Samina pah iya spiak agi digalau antu nya. Pah Salau spiak nya tadi lalu disimpan Antu kara ke dalam rintong, serta lalu diulor iya ka baroh.

Meda rintong bisi diulor bakanya, dia Assan lalu gaga, nyangka Salau udah tembu muar manyi ba puchok kara. Nyau kelama rintong ke begitang kating-kating lama agi baroh agi ga rintong peda iya dalam petang dia Assan tepeda ke utai dalam rintong baka pah mensia dalam nya. Leboh rintong nyau ulih tilik iya nya baru Assan nyau ngelala nya pah Salau dalam rintong nya. Pedis ati ka anak ti pemadu di kesayau ka iya digaga Antu baka nya, Assan lau narit tali rintong nya enggau pengabis tulang iya. Dinga iya lalu semerap sereta lalu meredup laboh ari puchok kara, tak mereding ninggang tanah.

Udah nya Assan lalu bejalai belubah-lubah nuju ngagai endor utai ti laboh. Datai dia, iya lalu tepeda ka bangkai Antu nyau abis tebelimbor untak kiba kanan, pala pechah tepangka sebelah bandir kara engga kayu bukai ti nyarok batang kara nya.

Enda berapa lama udah nya, dia Assan lalu bisi ninga nyawa orang munyi tu, “Isa antu kara.” Suah bendar nyawa orang nya didinga Assan, tang tuboh nadai dipeda iya.

Iya pan berasai takut sereta geli, lalu beguai-guai ngambi pah Salau, lalu ditaban ka iya pulai ka rumah sida. Dia deh Assan seduai bini enda nemu utai nusah nya ngenang anak ti dikerindu seduai nadai enggau begulai sejalai agi. Ngutok diri meh tudah Assan laban ti udah mai anak iya muar manyi, laban enti enda dibai iya muar manyi tentu enda ga anak tulih ka badi enggau penusah ke baka nya.

Pah anak iya nya tadi lallu dikubur ka seduai ba pendam sida serumah. Assan seduai bini lama ngulit ngenang penusah tinggal anak parai ditangkap serta dipakai Antu Kara.

Leka Biau Piring

Sa, Dua, Tiga, Empat, Lima, Enam, Tuuuuujoh.

Enda aku busong ilang laya, 
Megai langgai manok banda, 
Kena aku miau ading piring pinang saleka, 
Laban aku tu nampong jako sera nyawa, 
Enggi aki kitai Rekaya, 
Iya endang landik ngajar kitai bebasa, 
Ka semua bala pengabang.

Enda aku busong laya pambu, 
Megai langgai manok kelabu, 
Kena aku miau ading piring kapu, 
Laban aku tu endang nitih ka ajar nampong jako, 
Enggi aki kitai Rekaya Jamban Atu, 
Iya landik ngajar kitai bebasa ngena jako, 
Nadai kala saru bekalih tunsang.

Aku tu miau sida Dara Santih bunsu Sirih ke tumboh betumbok takang, 
Dara Chelum Bunsu Tum Sedi lulun atas bedilang, 
Dara Bagau Bunsu Semakau rendang dagang, 
Dara Sandu Bunsu Gentu daun pisang, 
Sida tu sama udah digempuru ditu datai magang.

Aku tu mega miau sida Kumang Dara Simbut, 
Bunsu Pulut Jantan Jentawang, 
Bunsu penganan baka bulan rerak rumpang, 
Dara Letup baka tangkup bunga kejumpang, 
Enggau Endu Tematu Tali Betabu, 
Bunsu Telu Manok indu kepayang mekang.

Nya alai letup pan udah ga chukop, 
Asi pan udah ga bisi, 
Pinang udah ga chukup magang, 
Samoa perengka pan udah ga sedia, 
Ditiap genap nadai timpang.

Nya baru aku ngangau ka sida ke tindok nakal singit, 
Bejalai ngena burit, 
Nya ga Bunsu Chapak Burak, 
Ba-ukir ilak kesulai tandang. 
Kita nya meh ka diasa nerima bala pengabang, 
Diasoh nabi samoa orang.

Ooooooooooooooha! x 1

Tak lalu ketawa balat gaga, 
Ading piring pinang saleka, 
Udah dibiau enggau selanjau ijau manok banda, 
Gaga diasoh nabi meri basa ngagai Petara, 
Ke datai ari Tuchong Sandong Gemala, 
Di bukit lilit Gerija, 
Alai semuka dudok sembayang.

Nya orang ngembuan batu sedan bulan pernama, 
Enggau batu takang bintang tiga, 
Ambi ka ubat penyangga nyawa maioh pampang saribu guna, 
Ngasoh panjai umor nguan menoa.

Lalu ketawa gaga rindu, 
Pamping ading piring kapu, 
Udah dibiau enggau selanjau ijau manok kelabu, 
Nganti Apai Migu, 
Datai ari munggu madang engkajang. 
Nya orang ngembuan batu pupu gigi gumbang, 
Ubat landik bejako ba gulu tugong orang.

Tak ketawa tuchum Dara Chelum, 
Bunsu Tum Sedi Lulun atas bedilang, 
Udah dibiau enggau selanjau ijau manok sigon, 
Gaga nganti penatai Liba apai Dom, 
Datai ari pun kara nurun maioh betunjang.

Tak depan-depan ketawa ading piring penganan, 
Udah dikebau enggau selanjau manok jelayan, 
Gaga nganti penatai Ini Andan, 
Datai ari bulan ke meruan tuang-tuang, 
Nya orang ke ngembuan ubat jadian mali langkang.

Tak lalu ketawa gagit deh piring pulut mit, 
Udah dikebau enggau selanjau ijau manok kunchit, 
Nganti penatai sida Apai Sabit Bekait, 
Ari punggang tisi langit. 
Nya orang ngembuan batu pengait, 
Dikena ngulih ka duit mata wang.

Ketawa gaga amat asi ketupat, 
Laban udah kena biau enggau selanjau ijau manok kepiat, 
Nganti Kumang Dayang Sambat, 
Indu orang di urat dandi nentang, 
Nya ga indu pandai di pechunggai tunjok empat, 
Landik ngebat tukang tengkebang.

Ketawa chaie-chaie ading piring sungki, 
Udah kena kebau enggau selanjau ijau manok pungka laki, 
Gaga nganti penatai Keling Aji, 
Datai ari tuchong engkeraji padi, 
Munyi negeri maioh orang. 
Nya orang ke berani ati mutus kempang.

Piring rendai pan ketawa terai-terai, 
Udah dibiau enggau selanjau ijau manok tawai, 
Gaga nganti Raja Selampandai, 
Datai ari menoa iya di Tatai Tanah Nyadai, 
Redai terabai rampai temiang. 
Nya orang ke ngembuan batu nyiur nyuntai, 
Enggau batu bingka lia mulai, 
Nya ga ubat besai ngasoh gerai, 
Tau mudah bulih utai, 
Ngasoh gayu guru gerai nyamai.

Ketawa gaga ading piring penganan jala, 
Udah dikebau enggau selanjau ijau manok banda, 
Gaga nganti Raja Simpulang Gana, 
Datai ari Letong Jalong Temaga, 
Tinggang bunga nuyan meranggang, 
Nya orang ti ngembuan leka sesangga tepang, 
Enggau taring uting babi menoa, 
Kena kitai ngintu simpuli padi paya, 
Ngambi ka tak sebaka manah magang.

Lalu taong-taong munyi ketawa ading pimping piring tepong, 
Udah di kebau enggau selanjau ijau manok tuntong, 
Gaga nganti penatai Aki Lang Menaul Buban, 
Ari engkeleman bulan mandang, 
Aki Lang Menaul Tuntong, 
Ari Kebong Langit Ngeruang, 
Nya orang ke ngembuan batu pugu danau kampong, 
Pengantong upong balang beraang, 
Enggau ubat mali rampong, 
Ngasoh betampong tau serang.

Panjai ai, panjai kekira, 
Luas langit, luas dunya, 
Pegai tegoh batu indu gemala, 
Ngambi ka tampak nama, 
Jelai berita dinga orang bap dunya bumi belinggang.

Gayu ko antu, 
Nadai apa ko Petara, 
Semua kitai bulih pengelantang.

Ooooooooha ! x 3

Note: 
Udah tembu miau tu, perengka piring pan lalu dibagi ba dalam siti-siti chapak. Udah genap piring dibagi, nya baru nyampi ngangau ka petara, bunsu antu enggau petara aki petara ini ke udah parai. Sida tu diasoh datai ngabang nitih ka bansa pengawa gawai kitai.

Perengka dikena ngaga piring biasa:

• Semakau & daun apong (Tobacco & wrapper)
• Perengka pinang (pinang, sirih, kapu, gambir) dalam baku
• Asi Amat (Cooked rice)
• Garam (Salt)
• Asi Manis (sweet fermented rice)
• Ketupat (glutinous rice cooked in palm leaves)
• Asi pulut burak, merah, kuning & chelum (white, red, yellow & black glutinous rice cooked in bamboo)
• Penganan iri (rice cake)
• Sagun (made of coconut powder & rice flour)
• Beras Kuning (yellow rice – for sprinkling the piring)
• Letup or rendai (puffed rice or pop rice)
• Telu manok (hard boiled egg)
• Telaga (a small cup containing rice wine)
• Bulu manok kena nyampi & bebiau, dichabut lalu diunsut enggau darah manok nya empu (a feather from fowl used during prayer is plucked out and dipped in its blood when it is killed)

Chara magi tauka mela piring:

• Tabur ka letup (digaga ari beras pulut) enggau beras kuning.
• Bagi pinang, sirih, kapu enggau gambir.
• Bagi insap – rukok apong enggau semakau.
• Bagi asi enggau asi pulut – asi burak, pulut burak, pulut chelum, pulut merah enggau pulut kuning.
• Bagi tumpi (kuih digaga ari tepong mulong), penganan penyaran, sungkui (digaga ari beras tutok dibungkus enggau daun pisang), ketupat (tau enda ibuh enti bisi asi pulut), sagun (digaga ari tepung beras enggau nyiur parut).
• Bagi pisang.
• Bagi garam ngagai tiap iti pinggai tauka sarang piring.
• Bagi telu manok.

Udah nya baru ngambi manok dikena nyampi. Leka sampi mesti nitih ka bansa gawai. Tembu nyampi lalu tabur ka letup beras pulut enggau beras kuning. Selamat ngintu ari gawai ngagai kita semua.

Raja Sempulang Gana

Nyadi Raja Sempulang Gana tu digelar Raja Sua. Iya dikarap ka bansa Iban Kenyau ari asal kelia bekuasa atas pengawa betanam betupi ke nyadi batang pengidup enggau penatai pemisi bansa Iban. Kebuah iya nyadi Petara ti bekuasa atas pengawa tu, laban iya ngembuan pesaka tanah dapur, untong iya leboh sida menyadi bedua reta tengkira sebedau sida berserara pendiau ari pangan diri kelia. Nambah ka nya, iya mega jadi enggau anak Raja Semarugah ke ngembuan gemala ati tanah, lalu nguasa semua tanah, ti ngasoh iya disembah ngena piring ading leboh kitai ngerja pengawa ba tanah.Nyadi penatai Raja Sempulang Gana nya ari Raja Durongke bejulok Lumpong Tibang Bebaring, Durong tuai ke berumah di tatai belakang tinting. Iya bebini ngambi Endu Dara Talun Pelangka ngemata ka kuta dinding hari, Endu Cherembang Cheremin Bintang Tukoh Lawang Pinggai Bekaki, lalu iya mega digelar orang Endu Sabaku Techabut Sumping ngembuan taring ubat kelia, Endu Iyak Jelapa Pirak ngembuan kutak ubat lama. Seduai iya beranak ka Raja Jembu dudok di batu tinggi dedingai, Meta Raja Pengibai. Iya bebini ngambi Endu Endat Baku Kansat ngembuan ubat simpulai umai, Endu Kumang Baku Palimbang ngembuan lemambang batu pengembai. Seduai iya beranak tujoh iko, lalu Raja Sempulang Gana tu anak seduai ke biak ka sida menyadi.Tusut Raja Sempulang Gana:
Raja Durong x Endu Dara Talun Pelangka = Raja Jembu x Endu Endat Baku Kansat = Aki Lang Sengalang Burong, Raja Menjaya, Biku Bunsu Petara, Raja Selampandai, Ini Inda tauka Ini Inee, Anda Mara (Ganga Ganggai) & Raja Sempulang Gana.Raja Sempulang Gana x Endu Endun Serentum Tanah Tumboh beranak ka:

1. Sigai Raja Besai nguan menoa.
2. Endu Lilih Sintong Benih Pulut Belangian, kindang-kindang ngambu diri ba-ambai ka petakang bintang tiga, kedua bali nama iya Endu Lilih Sintong Benih tengah tegalan, rengai-rengai ngambu diri ba-ambai ka tangkai bunga sesangga (Cheremie).
3. Endu Kumang Chermin Bintang Subang Bekaki, Endu Achin Beringin Tali.
4. Endu Rening Genturing Urik Langit, Tali Unan Delapan Belas Belit.
5. Durong Biak bejulok Sukong Lamba Jinggau, ngelembong ka burit tibang bepuncha. Bujang jegalang nyamai diau lantang.
6. Endu Dara Chanda mangkang nanga temaga gelang, Dara Bajik kelandik kaban bujang.

Nyadi Sigai tu anak tuai Raja Sempulang Gana. Iya bebini ngambi Endu Lulong Tempukong Ati Tanah ditelah Kelasah Tikai Pandan, Endu Takang Bintang Biduyah ditelah Saripah Adi Tuan. Bini Sigai tu anak Raja Tandok ke datai ari ai nyurok numbok nerajang, kadua bali nama iya Raja Nuyan datai ari riam dalam belaboh nunggang. Bini Raja Tandok tu benama Endu Teberu Hari ke pengesai ambun midang, Endu Sidi Bintang Teradani ke pegari tampak terang anak Gangga Ganggong (tauka Anda Mara – menyadi Raja Sempulang Gana) ke penyadong antu tuah, Gangga Ganggai ke penatai utai mudah. Gangga Ganggong tu bebini ngambi Endu Sudan ngembuan bungkan batu kemarau, Endu Kumang ngembuan gempanang tekang mau.

Nyadi Endu Lilih Sintong Benih belaki diambi anak Sengalang Burong ke benama Ajee ke berani ngilah bulan, Menteri Suka Raja Rengayan. Seduai iya beranak ka:

1. Meta Raja Rengayan, Keling Nading Kerangan.
2. Endu Salaku Kumbu Muau, ke beria tampak moa, Endu Tegi Bali Berandau, Ke tanda anak Raja.

Nyadi Endu Kumang Cheremin Bintang belaki diambi Mandie ke berani tau tenong, Tandang anak bujang Kuang Kapong.Nyadi Endu Rening Genturing Urik Langit belaki diambi Maga Raja Lama pun menoa, Bujang Sengalang nyamai diau, lantang anak Raja Petara.Nyadi Durong Biak bebini ngambiEndu Chabut Rumput Kerajai tumboh engkilili tisau antara, Endu Kumang Tangkuang Tangkai Padi, tumboh di tisi jalai raya.Nyadi sakali Raja Sempulang Gana pegi ngiga orang ke bisi ngembuan leka mengkenyang. Nyau kelama iya udah belayar di tasik, iya lalu datai ba menoa siti ke benama Gelenggang Gumbang muat, Kerimpak Guong Silat, di kaki pasir entap ke tau alai bemimpi nyadi kenyap, ngasoh orang terangkat jadi raja. Menoa nya dipangkang Endu Kelinah ke terubah nemu jalai idup, kadua bali nama iya Endu Kaul Kawa Penyangga tulang lembut. Ba iya dia Raja Sempulang Gana bulih leka mengkenyang. Nyadi leka mengkenyang tu beguna bendar, laban iya jadi ka sulu padi tumboh ba umai ari pesan Raja Sempulang Gana empu kenyau ari iya ke bulih pesaka nya ari Endu Dara Kelinah kalia.

Nya kabuah leboh bansa Iban bumai, apin padi ditugal ka ba tegalan, dia mengkenyang dulu ditanam sendi salepak panggal benih. Mengkenyang tu mali disingkang enggai ka burut enti orang nya lelaki, lalu tara enti orang nya indu.

Leboh mengkenyang ditanam di umai, enti iya pisit bebunga, nya madah ka pemanah padi taun nya. Enti iya bebunga engka sakali aja, nya madah ka padi enda tentu berapa buah. Mengkenyang orang ke enda kala bulih padi endang enggai bendar bebunga.

Samoa Iban ke bumai, sida endang nitih ka ajar Raja Sempulang Gana. Sida nyembah iya berari-ari leboh sida manggol serta enggau leboh maia padi sida sakit balat. Bakanya mega enti sida suah enda mujur taun, sida niri ka gawai ke dikumbai Gawai Batu awak ka Raja Sempulang Gana mela batu umai sida.

Nyadi enti padi sida sakit, dia Iban endang mela iya enggau gawai ke dikumbai sida Gawai Umai awak ka Raja Sempulang Gana ngerai ka umai sida.

Leboh ngerja pengawa gawai umai, dia orang ngambi lemambang mengap, minta tulong, minta sukong Raja Sempulang Gana serta enggau antu enggau lulu.

Leka Biau Melaki Bini

1. Pun Biau Melaki Bini:

Sa, dua, tiga, empat, lima, enam, tu…………joh.

Berasai supan aku ka nelanga ka rasa dabong lancham,
Megai selanggai manok jelayan,
Iko layu geran pepisan,
Rekong tuntong kelapong ensariban,
Bulu nyeregu udu ensebam.
Laban tu nitih ka ripih adat iban,
Nampong adat Sengalang Burong,
Digela Tuntong Menaul Buban,
Diau di kebong langit renjan,
Kena tata ujan nyala laboh ngalan,
Nadai kala silam nyadi petang.

Agi suma aku ke nelenga ka rasa dabong tisi,
Megai langai manok pungka laki,
Iko layu enseriban padi,
Rekong tuntong tuchi,
Langgai panjai kemudi besi.
Ko sida ke tuai ke lama udah nadai laya lesi,
Ngibun titi penguji,
Di-indik pedis kaki,
Dijengkau rapas jari,
Nampong penemu aki kitai Damu laki Remie,
Leboh sida ke baru jadi main beguang.

Agi suma lain asai aku ka nelenga ka rasa dabong landai,
Megai selanjau ijau manok tawai,
Iko layu panjai merundai, dada buya bekaka adong sungai.
Aku tu nampong jako orang ke lama udah pambu nyaia nadai,
Nampong ajar aki kitai Telichai,
Ti terubah begulai enggau Endu Liu Tangkai Ngererai,
Datai ari tembawai kerapa besai asam semadang.

Nya alai tu tak baka ka lebih-lebih, luba-luba,
Baka ka jegak-jegak, chua-chua,
Dipeda kita ke kemumok dudok semuka,
Endu terekun sabun china, enggau melanyi bujang melisa.
Tang tu endang jalai kitai nitih ka ripih adat kitai bansa,
Nampong adat Demong laki Rinda,
Tuai ti dulu ngading piring penganan jala,
Mugu kayu ngubah menoa,
Nampong perabong rumah raya,
Begulai ka peretai rampang bunga,
Bederian ka geman balang begumba,
Mengkang rang nangkup nyawa,
Ka tanda sida sama samuka jadi sanentang,
Nya ka dikumbai orang derian palit mata,
Ka tanda sida udah bebala belaban serang.

Nya alai aku tu nyau deka nunda biau Apai Keling Ajie,
Nunda sampi manang menani,
Bisa di nyawa, sidi di jari,
Keba bau lempai mengkudu ampang menyeti,
Leboh iya belian nyagam limban, nyengkabong hari,
Ngansan semengau ke deka nyau laya lesi,
Serta enggau peretai bungai muni,
Pelian iya malam, pagi peda lanji-lanji,
Nyadi gempanang mau tuchi,
Berega ka mensia skayu nengeri pasar melintang.

Nya alai tu nyau nunda biau Apai Laja,
Nunda sampi menani manang menjaya,
Sidi di jari tunjok dua,
Keba bau lempai mengkudu ampang mensiga,
Leboh iya ke belian nyagam limban, ngabis ka menoa,
Ngansau semengau ti deka lenyau ilang laya,
Sereta enggau peratai rampang bunga.
Pelian iya malam, peda pagi remba-remba,
Nyadi anak mensia dua-dua berambau mansang.

O……hoi,

Enda aku busong laya danjan,
Megai langgai manok jelayan,
Ngeban pala mulai ka pisan,
Enggi Endu Gemanang Tekang Intan,
Enggau sida melanyi bujang ganggam,
Dudok di stawak dua betiban,
Laban aku tu endang nitih ka ripih nampong pesan,
Aki kitai ke udah rimpi ilang padam,
Nunda pantang Belang Pinggang apai Geraman,
Ti udah ngajar bejamban ka bedil indu meriam,
Ka jamban nyundang pinang.

O…….Hoi,

Enda aku busong laya lesi,
Megai langai manok pungka laki,
Ngeban pala pulai ka kaki,
Enggi Endu Tekang Gempanang Mau Tuchi,
Seduai jengayang bujang mereti,
Ti dudok di stawak tap ampang bali menyeti,
Laban aku endang nitih ka adat,
Nampong pengingat sida ka lama lenyap laya lesi,
Nampong lupak abi kaki, nampong pepatah abi jari,
Aki kitai Beti be bebini nepat Riti,
Indu pantun tampun puji ke tuchi nadai ninggang.
Nya alai iya bulih nama pansut berani,
Digelar Bujang Brauh Ngumbang.

Aku ka bediri degi-degi chegit-chegit,
Megai selanjau manok kunchit,
Nenjang Endu Takang Gempanang Mau rakit,
Nadai mai ati jai, tang mai ati gaga udu gagit,
Miau seduai ke berimbai dudok bekempit,
Lalu nyampi munyi menani manang Disit,
Ngajih ka seduai ke baru begulai ka ratai bunga bangkit,
Ila udu manah nasit, indah enda baka siet tandan pinang.

Aku ke megai selanjau manok banda,
Nenjang Endu Tabu Benang Jara,
Seduai Melanyi Bujang Melisa,
Ngeban seduai ke dadugau berimbai dua,
Berimbai ka kerigai rusok rinda,
Rentak-rentak dudok di stawak raban temaga,
Tap menyeli bali mensuga,
Sigi remba-remba ngambi gamal jelu nyala,
Nelenga ka nyawa pun raang.
Ukai aku mai ati jai,
Tang aku mai ati rindu ransang gaga,
Lalu nyampi munyi menani manang menjaya,
Ngajih ka seduai ke baru begulai ka ratai rampang bunga,
Indah enda baka aba bunga chempaka bebau ngaba tutu bala indu kelabembang.

Lama ngetu tulong ngenong,
Aku ke megai selanjau manok sabong,
Nentang seduai ke nyerigang dudok bebandong,
Atas stawak raban guong, tap menyeti bali belumpong,
Asai ke mangkang padong jelu remaong,
Teleba negong di padong moa lubang.

Lama aku udah ngenong tulong tebelenga,
Aku ke megai selanjau manok banda,
Ngebau seduai ke dadugau berimbai dua,
Dudok atas stawak raban temaga, tap menyeli bali mensuga,
Ba tengah tugong bala,
Bisi tuai, bisi biak, bisi dara,
Asai ka nentang pantai panjai radai baya,
Nelenga ka nyawa nukang ka rang.
Ditu kita ke begulai dudok rindu,
Deka begulai ka ratai bunga kapu,
Enggi lengayun Endun Endu seduai melanyi bujang tuyu,
Tang enda ulih ditembu kitai enggau jako berambai nyampau kelulu,
Tang diatu baru aku nyau deka ngangau ka sida ke udah laya ilang pambu,
Nyapa menjaya manang lansu,
Minta sida sama datai ditu,
Sama enggau kitai nanchang sinang bunga kapu,
Ngambi ka betabu din, betabu ditu,
Enda tebuka buku gerah tanchang.

Diatu kitai ti berimbai dudok nyerungkong,
Sama rindu ransing bejako nyampau di-itong,
Laban kitai ka begulai ka rampang bunga belitong,
Enggi Endu Tematu Telu Burong seduai Melanyi Bujang Lempong,
Tang enda ulih tembu ka aku ngapa enggau tempenga ujong dabong,
Tang diatu baru aku nyapa Petara sida ke laya dulu pumpong,
Petara sida ke tuai lama udah nadai laya chundong,
Petara sida gelanyang manang chelong,
Minta sida datai begulai maioh betugong,
Enggau kitai sama nanchang sinang bunga balong,
Ngambi ka sama siti upong saum gagang.

Ni kita Petara Tindin bejulok Pimpin Bragah Ngindang,
Petara Entinggi bejulok Keti Aur Tulang,
Petara Bangkam ngaram ka sampan barong Rajang,
Petara Gerijih bejulok Lilih Ai Marang,
Petara Dana Rekaya Bayang,
Petara Sabok Apai Mang,
Petara Atu apai Saang,
Petara Chulo bejulok Tarang,
Diasoh datai magang enggau kitai besurok dudok nyerigang.
Nya alai Selampandai lalu dikumbai padah ka magang.

2. Ngagau Ka Petara merkat orang ke baru jadi:

O-HOI, O-HOI, O-HOISa, Dua, Tiga, Empat, Lima, Enam, Tu………joh.

Ni kita di Munggu Madang Pudu,
Ambi ka teku gelong ka tuong.
Ni kita di Punggang Pungga Agang Arang Tebelian,
Alai nyepuh pedang Bujang Berani,
Ni kita ke mangkang tengkujoh panchor wong,
Gurong-gurong numpu takong batu segala,
Ni kita ke berumah diTatai Balai Nyabong,
Belayan ditepan besi kemuja,
Ni kita di tuchong guna,
Sarang Puchong Penyangga Nyawa,
Enda ngasoh nyaia nyadi tumbang.
Nya menoa Selampeta tukol lenda betempa rentang-rentang,
Menoa Selampetoh tukol kamboh ngamboh tuboh leminang mansang.
Minta kita ngamboh tuboh kukoh enggi seduai tu,
Ngambi ka tegoh tau belamatang.

Nya baru aku ngangau ka orang di pun jambu gajah,
Bebuah tunsang ketupang,
Lemai bebungai, pagi baka ka rebah,
Terengkah di tanah Lembang Muang.
Nya ga menoa di pangkang Gelanyang Manang Jerah,
Ke ditelah Manang Semparang,
Minta kita nata pala seduai tu enggau batu leka gemalai lemang,
Enggau ubat penyelap batu kerat janggut belang,
Ngambi ka seduai ti begulai ila gerai nyamai,
Chelap embap, Lantang senang.

Nya baru aku ngangau ka orang di Lepong Danau Mau,
Tampong Lupak Sungai Pirak,
Ba-ulu ka letong danau Tajau,
Bakelai ka begri Menaga Bujang.
Nya ga menoa dipangkang Anda Mara,
Ke nyulut kaya tebilang lantang,
Minta nuan meri seduai ti baru begulai,
Gempelu batu bena bunga pasang,
Enggau batu pupu gigi gumbang,
Awak ke seduai enda brasai,
Nugong ka reta menang bedagang.

Nya baru aku ngangau ka orang di Tuchong Sandong Gemala,
Betampong enggau bukit lubang singa,
Ke benyawa madong lubang,
Sebarai enggau lepong ai ngelagua,
Ngebu ka pintu moa serga,
Ke nyelabira tampak terang.
Nya menoa dipangkang Allah Ta’ala,
Ngemata ka dunya bumi belinggang.
Kami minta nuan ngemata ka seduai,
Ti baru begulai satangkai saum bunga,
Ngambi ka seduai gerai nyamai nguan menoa,
Ke beberita ngelui orang.Nya alai Selampandai ke udah milai,
Nyau be-ati deka pulai ari pengawa daun gawai,
Ngagai menua iya empu di tatai tanah nyadai,
Sebrai enggau sungai wong nunggang,
Lalu ninggal ka seduai ke baru begulai saum takang,
Batu buah nyior nyuntai enggau tandok rusa mulai,
Tauka ubat besai kena seduai bumai,
Ngambi ka seduai enda berasai,
Ngisi engkabai tibang terantang.

Nya alai Matai Tuai Menjaya,
Udah ga ninggal ka seduai batu pinang saleka,
Enggau batu buah pauh laba,
Ke ubat sida melanyi anak sendia,
Dikena sida besekula,
Ngambi ka tau bulih degree kena negi ka menoa Malaysia.
Tang utai tu disua ka iya enggau tapa jari dua,
Leboh seduai baru begulai,
Malai ratai rampang bunga,
leboh seduai ke baru tindok di retok papan pelangka,
Dia baru Salempandai tuai nyua ka seduai batu pengembar,
Jadi ka ubat pengumbai mali langkang,
Ngambi ka utai nadai di-kenadai,
Bisi magang nadai timpang.

3. Pengujong Biau Melaki Bini:

Tang apin apus taun tu, dulu ga seduai bebudi enggau melali Dato Intai,
Datai ari gilik tasik besai,
Lalu ninggal ka seduai anak pegari benda rawai,
Enggau gempanang tekang mau urai,
Endah ditukar enggau utai,
Tang dikena iya ngambu seduai ka penyangkai alai bedagang.
Leboh seduai ke tindok di retok papan pelangka,
Bebungkor enggau selangor ampang mensuga,
Bepanggal ka gepal kapok china,
Gali galai malai ratai rampang bunga,
Dia ila baru seduai bemimpi nengkadah takang bintang tiga,
Asai ka nengkadah sedan bulan pernama,
Betemu enggau sentuku Selampandai Dara,
Lalu nyua ka tapa jari dua,
Dani pagi lalu ditusi ngagai sida menyadi karong berada,
O’ manah meh mimpi seduai ke baru begulai ratai rampang bunga,
Baru sakunsi jadi sama.
Baka nya mimpi niang Orang Kaya Dana menya,
Leboh iya ke baru begulai enggau perinjai amba mata,
Nya pun iya udu kelalu balat berita munggor ka menoa,
Mapa ka bala skayu nanga Batang Sengkawang.
Nya pun tinda bulih kelutong bedil temaga digela Bujang Timpang Berang.

Tang apin apus taun tu,
Dulu seduai bebudi enggau bansa melali bansa China,
Iya lalu ninggal ka seduai sigi begeri benda menaga,
Ko iya, enda iboh dibeli nadai rega,
Laban nya dikena iya bekelala,
Ngambi seduai ka mengada tangkai menimang.
Leboh seduai ti baru begulai malai ratai bunga belitong,
Bebungkor enggau selanggor ampang belimpor,
Dia seduai lalu bemimpi nengkadah tekang bintang beranatong,
Nerima bulan pernama kembong,
Betemu enggau Gangga Ganggai kedua Gangga Gunggong,
Lalu nyua ka seduai tapa jari ujong,
Dani pagi lalu ditusi seduai ngagai menyadi karong kerubong,
O’ manah mimpi seduai ti baru begulai jadi sagempong,
Baka nya mimpi Rekaya Rabong,
Leboh iya ke baru berimbai enggai prinjai ambai sangkong,
Nya pun Rekaya Rabong berita bala beruntong, tebilang lantang,
Keba lumbong iya mengkang begantong tinggi begitang.

Tang apin abis taun tu,
Dulu ga seduai bebudi enggau melali china chantong,
Ke lalu ninggal ka seduai gong lampong,
Dipangkong sigi rengong-rengong inggar nerantang.Kejakang Manang Jerah,
Tu endu tabu ubong merah seduai Melanyi Bujang Bungah,
Nyau be-ati deka pulai ari pengawa gawai nikah,
Ngagai menoa iya di pumpun kayu ubah ke bebuah nadai upang,
Lalu ninggal ka seduai gempelu batu getah,
Tau dikena seduai nyapai mudah,
Bulih gerah nadai ketimpang.

Kejakang Manang Chelong,
Menyadi Aki Sengalang Burong,
Tu endu tekang gempanang mau raung seduai Melanyi Bujang Lempong,
Nyau be-ati deka pulai ari gawai melah selabah pinang upong,
Ngagai menoa iya di kebong langit landong baka sempayung pagar bintang,
Lalu ninggal ka seduai gempelu batu,
Lua bekubu burong ketupong,
Enggau taring uting luchik juring babi kepong,
Ngagai seduai ke baru begulai jadi sagempong,
Kena seduai ngintu telasak anak di-indong,
Ngambi ka betampong tau lantang.

Kejakang manang menjaya,
Menyadi aki Simpulang Gana,
Diatu endu tematu telu burong gaga seduai Melanyi Bujang Melisa,
Nyau be-ati deka pulai ari pengawa gawai gaga,
Pulai ngagai menoa iya di letong jalong temaga,
Tinggang bunga nuyan meranggang,
Lalu ninggal ka seduai ke baru begulai jadi sama,
Batu takang temiang ransa,
Enggau keruntok tandok rusa beperiga,
Ke ubat kena seduai ngiga pesaka,
Ngambi ka reta bisi magang.

Diatu baru kejakang manang sidi,
Apai selampandai sempeti api,
Nyau be-ati deka pulai ngagai menoa sida,
Di tisi langit lati lanji-lanji baka pua lebor api,
Mansau tisi benyaang punggang,
Udah enggau bejadi ka seduai melaki bini.
Diatu baru sida ninggal ka seduai batu pasok bumi,
Sigi lanji-lanji timbang bulih saketi berat sepengedang.
Nya ga ubat ngasoh seduai peridi maioh diadi anak ditimang.

Nya alai orang ke ngulu ka seduai,
Besarok dudok atas babendai,
Ti nya agi jengayang bujang besai,
Ti udah kena biau enggai selanjau ijau manok tawai,
Enda lama iya ila bisi orang enggau begulai,
Baka seduai ngentudi ari belakang.

Lalu enti orang ti ngulu seduai,
Besarok dudok bebanda atas stawak raban temaga nya agi dara,
Ti udah dibiau enggau selanjau ijau manok banda,
Ila kitai ninga berita iya nadai belepa,
Kena tapat bala kaban bujang.

Nya alai enti orang ke ngulu seduai tu,
Udah bisi orang enggau begulai sajalai saum takang,
Enti iya apin bisi telasak anak di-inang,
Enda lama iya ila bisi di-wa anak di-timang,
Laban udah kena biau Apai Sibau Rumbau enggau
Selanjau manok bejalak buya anak sematong tapang,
Laban iya endang orang bisa di nyawa pun raang,
Sumpah iya pemadu manah chukop bilang,
Jako iya pan tau, nadai upang.

Nya alai Antu udah ga nemu dipadah ka magang,
Petara pan udah ga asoh ninga,
Ngemata ka pengawa buah pemansang,
Selampandai pan udah ga diasoh datai,
Ngagai pengawa melah pinang.

Nya alai baka pisang seduai tu ila,
Bemadang bandong tambak,
Baka tebu seduai tu ila.
Bekerang bandong anak,
Baka tubai seduai tu ila,
Bebatang bandong rarak,
Betuboh maioh beranak betelesak anang milang,
Nya alai minta tanggong manang Chelong,
Ngagai batu anggong, ngambi ka sama beruntong nguan menoa,
Minta sampai ka manang malai ngagai batu chanai,
Ngambi ka tabentai nyadi raja,
Minta sagu ka manang bidu ngagai batu idu,
Ngambi ka gayu guru nguan menoa.

Gayu ko sentuku,
Grai nyamai ko selampandai,
Nadai apa, nadai nama ko petara.
Kitai tu sama-sama nampok ka Tuchong Rabong Bernama,
Jelai berita didinga orang.

OR

(Nya alai antu udah diasoh nemu bisi magang,
Petara diasoh ninga malik nentang,
Salempandai udah datai sampal ngabang,
Ubat udah ga seduai genap nadai ketimpang.
Gayu seduai ko Sentuku,
Gerai ko Selampandai,
Nadai apa ko Petara,
Baka pisang kelolong tambak,
Baka tebu tampong telesak,
Baka bukau kelulong anak.)