Raja Sempulang Gana

Nyadi Raja Sempulang Gana tu digelar Raja Sua. Iya dikarap ka bansa Iban Kenyau ari asal kelia bekuasa atas pengawa betanam betupi ke nyadi batang pengidup enggau penatai pemisi bansa Iban. Kebuah iya nyadi Petara ti bekuasa atas pengawa tu, laban iya ngembuan pesaka tanah dapur, untong iya leboh sida menyadi bedua reta tengkira sebedau sida berserara pendiau ari pangan diri kelia. Nambah ka nya, iya mega jadi enggau anak Raja Semarugah ke ngembuan gemala ati tanah, lalu nguasa semua tanah, ti ngasoh iya disembah ngena piring ading leboh kitai ngerja pengawa ba tanah.Nyadi penatai Raja Sempulang Gana nya ari Raja Durongke bejulok Lumpong Tibang Bebaring, Durong tuai ke berumah di tatai belakang tinting. Iya bebini ngambi Endu Dara Talun Pelangka ngemata ka kuta dinding hari, Endu Cherembang Cheremin Bintang Tukoh Lawang Pinggai Bekaki, lalu iya mega digelar orang Endu Sabaku Techabut Sumping ngembuan taring ubat kelia, Endu Iyak Jelapa Pirak ngembuan kutak ubat lama. Seduai iya beranak ka Raja Jembu dudok di batu tinggi dedingai, Meta Raja Pengibai. Iya bebini ngambi Endu Endat Baku Kansat ngembuan ubat simpulai umai, Endu Kumang Baku Palimbang ngembuan lemambang batu pengembai. Seduai iya beranak tujoh iko, lalu Raja Sempulang Gana tu anak seduai ke biak ka sida menyadi.Tusut Raja Sempulang Gana:
Raja Durong x Endu Dara Talun Pelangka = Raja Jembu x Endu Endat Baku Kansat = Aki Lang Sengalang Burong, Raja Menjaya, Biku Bunsu Petara, Raja Selampandai, Ini Inda tauka Ini Inee, Anda Mara (Ganga Ganggai) & Raja Sempulang Gana.Raja Sempulang Gana x Endu Endun Serentum Tanah Tumboh beranak ka:

1. Sigai Raja Besai nguan menoa.
2. Endu Lilih Sintong Benih Pulut Belangian, kindang-kindang ngambu diri ba-ambai ka petakang bintang tiga, kedua bali nama iya Endu Lilih Sintong Benih tengah tegalan, rengai-rengai ngambu diri ba-ambai ka tangkai bunga sesangga (Cheremie).
3. Endu Kumang Chermin Bintang Subang Bekaki, Endu Achin Beringin Tali.
4. Endu Rening Genturing Urik Langit, Tali Unan Delapan Belas Belit.
5. Durong Biak bejulok Sukong Lamba Jinggau, ngelembong ka burit tibang bepuncha. Bujang jegalang nyamai diau lantang.
6. Endu Dara Chanda mangkang nanga temaga gelang, Dara Bajik kelandik kaban bujang.

Nyadi Sigai tu anak tuai Raja Sempulang Gana. Iya bebini ngambi Endu Lulong Tempukong Ati Tanah ditelah Kelasah Tikai Pandan, Endu Takang Bintang Biduyah ditelah Saripah Adi Tuan. Bini Sigai tu anak Raja Tandok ke datai ari ai nyurok numbok nerajang, kadua bali nama iya Raja Nuyan datai ari riam dalam belaboh nunggang. Bini Raja Tandok tu benama Endu Teberu Hari ke pengesai ambun midang, Endu Sidi Bintang Teradani ke pegari tampak terang anak Gangga Ganggong (tauka Anda Mara – menyadi Raja Sempulang Gana) ke penyadong antu tuah, Gangga Ganggai ke penatai utai mudah. Gangga Ganggong tu bebini ngambi Endu Sudan ngembuan bungkan batu kemarau, Endu Kumang ngembuan gempanang tekang mau.

Nyadi Endu Lilih Sintong Benih belaki diambi anak Sengalang Burong ke benama Ajee ke berani ngilah bulan, Menteri Suka Raja Rengayan. Seduai iya beranak ka:

1. Meta Raja Rengayan, Keling Nading Kerangan.
2. Endu Salaku Kumbu Muau, ke beria tampak moa, Endu Tegi Bali Berandau, Ke tanda anak Raja.

Nyadi Endu Kumang Cheremin Bintang belaki diambi Mandie ke berani tau tenong, Tandang anak bujang Kuang Kapong.Nyadi Endu Rening Genturing Urik Langit belaki diambi Maga Raja Lama pun menoa, Bujang Sengalang nyamai diau, lantang anak Raja Petara.Nyadi Durong Biak bebini ngambiEndu Chabut Rumput Kerajai tumboh engkilili tisau antara, Endu Kumang Tangkuang Tangkai Padi, tumboh di tisi jalai raya.Nyadi sakali Raja Sempulang Gana pegi ngiga orang ke bisi ngembuan leka mengkenyang. Nyau kelama iya udah belayar di tasik, iya lalu datai ba menoa siti ke benama Gelenggang Gumbang muat, Kerimpak Guong Silat, di kaki pasir entap ke tau alai bemimpi nyadi kenyap, ngasoh orang terangkat jadi raja. Menoa nya dipangkang Endu Kelinah ke terubah nemu jalai idup, kadua bali nama iya Endu Kaul Kawa Penyangga tulang lembut. Ba iya dia Raja Sempulang Gana bulih leka mengkenyang. Nyadi leka mengkenyang tu beguna bendar, laban iya jadi ka sulu padi tumboh ba umai ari pesan Raja Sempulang Gana empu kenyau ari iya ke bulih pesaka nya ari Endu Dara Kelinah kalia.

Nya kabuah leboh bansa Iban bumai, apin padi ditugal ka ba tegalan, dia mengkenyang dulu ditanam sendi salepak panggal benih. Mengkenyang tu mali disingkang enggai ka burut enti orang nya lelaki, lalu tara enti orang nya indu.

Leboh mengkenyang ditanam di umai, enti iya pisit bebunga, nya madah ka pemanah padi taun nya. Enti iya bebunga engka sakali aja, nya madah ka padi enda tentu berapa buah. Mengkenyang orang ke enda kala bulih padi endang enggai bendar bebunga.

Samoa Iban ke bumai, sida endang nitih ka ajar Raja Sempulang Gana. Sida nyembah iya berari-ari leboh sida manggol serta enggau leboh maia padi sida sakit balat. Bakanya mega enti sida suah enda mujur taun, sida niri ka gawai ke dikumbai Gawai Batu awak ka Raja Sempulang Gana mela batu umai sida.

Nyadi enti padi sida sakit, dia Iban endang mela iya enggau gawai ke dikumbai sida Gawai Umai awak ka Raja Sempulang Gana ngerai ka umai sida.

Leboh ngerja pengawa gawai umai, dia orang ngambi lemambang mengap, minta tulong, minta sukong Raja Sempulang Gana serta enggau antu enggau lulu.