Jerita Orang Kaya Pemancha Dana “Bayang”

Nyadi O.K.P. Dana “Bayang” di Padeh tu anak biak Orang Kaya Betie “Tajai Ngindang” seduai Endau. Rambau tu menya, semina siko iya aja ti pemadu iya besai bendar kuasa, serta dikarap ka semua tuai Iban enggau tuai Kayau dalam menoa bagi kedua. Iya bisi enam iko anak lelaki, lalu tiga iko anak indu Sida tu iya nya : O.K.P Nanang, Luyoh, Aji (Saji), Unting, Buda, Umpu, Tiong (f), Landan (f) enggau Badong tauka “Kumang Badong”(f).

Tusut Penatai & Peturun OK Dana Bayang:

Raja Sempulang Gana x Endu Endun Serentum Tanah Tumboh = Cheremie (f) x Ajie (son of Sengalang Burong) = Lenya (f) x Gambing = Begura x Bata (f) = Pagan x Chanda (f) = Nantang x Derang (f) = Tenang (f) x Sukun = Kantan (f) x Kutok = Nuai (f) x Lassam (Isup) = Sukun x Beragai (f) = {Sawai (f)}, Tom x Telo (Bragai) (f) = OK Beti “Tajai Ngindang” x Endau (f) = (Isik, Nawie (f), Senaang, Mandah (f), Kitang, Suma (f), Angkum) OKP Dana “Bayang” x Mengan (from Rapong) = {Tiong (f), OKP Nanang, Luyoh, Unting, Buda, Umpu, Landan (f), Kumang Badung (f)}, Ajie x Dimah (f) = Mindu (f) x Panglima Budin “Gerasi” = Mengan (f) x Ketit = Isah (f) x Enau = Roselyne Petry (f) x Lionel Frederick Mawar = Gregory Nyanggau (Author).

Manok sabong ti pemadu di karap ka iya bendar nya : Sabok “Gila Berani” apai Mang, Uyu apai Ikom, Unal “Bulan”, Igoh apai Lamban, O.K. Akun “Bedindang”, Isiek enggau Senaang. Laban pemerani sida manok sabong tu, semua kayau O.K.P. Dana Bayang nadai kala enda mujor. Apin iya nyadi tuai tau serang leboh iya benong ngangkat ka diri bujang, iya bisi mimpi. Dalam mimpi iya, asai ka di padah ka Kumang ti diau di tuchong Bukit Santubong, enda ngasoh iya munoh sebarang orang ka diau senebing Batang Saribas terus ngagai Luba Santubong nyengkaum Batang KayongTimor Selatan nengeri Pontianak. Nya alai kategal mimpi iya tu, sepamanjai umor iya endang nadai kala ngalah ka Bansa Melanau ti diau sabelah luba Nanga Rajang enggau ngilah nya kin.

Nya alai ari mimpi iya nya tadi, tiap-tiap kali mansa Luba Santubong dalam pejalai iya mansang nyerang ngagai menoa ari luar nya, iya enda tau enda ngetu samalam dia, awak ka ulih niki ka Bukit Santubong, deka nanya ngagai Kumang pasal pemujur serang sida. Dalam bulan Tujoh taun 1800, OKP Dana Bayang mai perau 120 buah ari Batang Saribas enggau Skrang ngalah ka Sungai Raya, dalam menoa Kalimantan. Iya ngalah ka maioh Kampong enggau rumah panjai Melayu enggau Dayak Selakau serta munoh munsoh lebih 100 iko ba endor nya. Nambah ka nya, sida mega bulih maioh bendar tangkap ke lalu dibai sida pulai ka menoa.

Udah iya ka mujor bendar ngalah ka Sungai Raya, OKP Dana Bayang mai tuai Melayu Saribas enggau Iban ari Skrang ngalah ka nengeri Sambas dalam taun 1804. Sida babendar amat bamok, serta maioh bendar bulih dengah nyengkaum bansa Selakau enggau Dayak Lara ti diau nisau menoa nya.

Dua taun lepas nya, dalam taun 1806, iya ngulu ka bala besai Iban ari Saribas enggau Iban ari Skrang ngalah ka China di pasar Sengkawang. Leboh ka bamok tu, maioh bendar bansa China ti nan ka diri ngelaban ngena parang bingkok ti dikumbai “Tat” di bunoh sida. Barang sida ti ulih ngelari ka diri lalu lari ngagai nengeri Mentrado. Maioh mega sida ditangkap lalu dibai pulai, lalu turun sida bedau diau di menoa Saribas datai ka diatu.

Kategal maioh bendar munsoh udah lari ngagai menoa Mentrado leboh iya ka ngalah ka Sengkawang, OKP Dana Bayang lalu ngalah ka Mentrado dalam taun 1810, ngena perau pangayau 180 buah ari Saribas enggau Skrang. Leboh bamok ka sekali tu, nyau beratus-ratus china mati di dengah sida, lalu ka mimit aja tangkap olih sida lalu di bai sida pulai. Diatu turun sida mega agi mengkang diau di menoa Saribas enggau Skrang, lalu sakeda bisi mega dijual ngagai tuai Melayu.

Lima taun udah bekau ka ngalah ka China Mentrado, dalam taun 1815, OKP Dana Bayang ngulu ka lebih 100 buah perau pengayau Melayu enggau Iban ari Saribas serta Skrang mansang ngalah ka Nengeri Pontianak malam hari. Sida bamok babendar amat ngalah ka kandang nengeri. Sida besatup enggau bala munsoh ti tegap bendar, lalu munsoh agi nitih sida ka tasik ngena perau. Leboh kayau tu, manok sabong OKP Dana Bayang diulu ka Libau “Rentap” enggau bala iya ti badengah bulih sabuah perau pala Melayu Pontianak, serta bulih perapasan keris sabilah ti beulu ka mas.

Dalam taun 1820, OKP Dana Bayang mai bala ngalah ka bansa Selakau ti diau dalam garis menoa Sarawak semak Tanjong Datu. Leboh ka bamok tu, laban munsoh ka di bantu bala Iban Lundu di ketuai ka OK Temenggong Jugah, anak lelaki Nyambong ti udah pindah enggau bala iya ngagai endor nya. Kebuah Iban Lundu masok ka diri ngagai laya tu Iban Saribas enggau Dayak Selakau ari dendam lama antara Sebuyau enggau Saribas. Maioh dengah ulih bala sida OKP Dana Bayang leboh ka tu. Pia mega bala sida pan bisi mega kena bunoh munsoh dalam serang ka sekali tu.

Dalam taun 1825, OKP Dana Bayang ngalah ka Mempawah semak Sambas ke alai sida maioh bendar badengah ka orang berikan.

Serta udah pukas kayau tu, maioh bendar tuai-tuai Saribas baka sida OK Antau “Linggang Negeri” seduai menyadi iya OK Gun “Mangku Bumi” ari Rimbas ngalah ka Iban Sebuyau enggau bala ti enda besai, bebalas ka tegal Iban Sebuyau ti mantu bala balau ti barengkah ngelaban Iban Saribas ba menoa sida iya empu di Rimbas, Paku enggau Padeh.

Rambau benong pengachau tu baru nyadi dalam taun 1834 OKP Dana Bayang ngulu ka lebih 200 buah perau pengayau Iban ari Saribas enggau Skrang mansang ngalah ka Sambas. Leboh Kuta munsoh udah alah, OKP Dana Bayang lalu naban ka mariam siti ti ditinggal ka munsoh lari. Mariam tu ti digelar “Bujang Timpang Berang” lalu di bai sida pulai ka Saribas. Meriam tu mega ka lalu dikena OKP Nanang (anak OKP Dana Bayang) ninggang bala Libau “Rentap” leboh ka nan ngelaban Rajah Brooke di tuchong Bukit Sadok datai ka maia sida nurun nundok ka perintah dalam taun 1861.

Sama taun OKP Dana Bayang ti ngalah ka Sambas, OK Rabong ari Skrang ngayau ngalah ka Balau Iban enggau Melayu ba Bukit Banting di Batang Lingga bebalas ka bala Balau ti udah nyerang Iban Skrang di Nanga Skrang.

Dua tiga taun udah OK Rabong ngalah ka Balau Banting, Iban ari Undup enggau Iban Dau selalu bendar ngaga pengachau bekayau ka Iban ari Kumpang enggau Lemanak ke diau di sabelah ili Batang Ai. Ngasai ka diri ka selalu kena kachau tu, sida lalu minta tulong OKP Dana Bayang bebalas nyerang Iban Undup enggau Dau. Ketarubah iya OKP Dana Bayang bejako madah ka Iban Undup enggau Dau ukai munsoh iya, nya alai iya enggai ngemasok ka diri ngagai laya tu. Tang orang Kumpang, Lemanak enggau Skrang keras bendar minta tulong iya, laban enti semina sida iya aja, tentu munsoh tu enda ulih di alah ka sida. Sida mega suah udah alah laban munsoh tu dalam kandang lima taun ti ka udah.

OKP Dana Bayang lalu nanya sida sapa orang ti deka di padu ka sida nyadi tuai kayau ngelaban munsoh tu. Sida Tuai Iban Skrang, Lemanak enggau Kumpang sama nadai maioh jako lalu setuju ngasoh OKP Dana Bayang nyadi ka tuai kayau sida.

Ninga sida tak berat bendar minta bantu iya, OKP Dana Bayang pan sinu serta deka berunding ka peminta sida. Iya lalu madah ka sida, sabedau iya nyanggup ngulu ka sida ngayau, iya dulu deka nanya semua bala Manok Sabong iya dulu serta enggau semua Tuai Kayau bukai di Saribas laban deka nemu paneka sida enggau ngayau ka sekali tu.

Orang seruan ari Kumpang lalu diasoh OKP Dana Bayang nganti berita ari Manok Sabong serta enggau Tuai Kayau bukai dalam kandang dua tiga hari nya. Dalam kandang dua tiga hari nya, tuai sida ari Ulu Layar iya nya Unal “Bulan” enggau manok sabong iya Igoh apai Lamban enggau Uyu apai Ikum, datai madah ka sida sama setuju deka enggau ngayau. Linggir “Mali Lebu” ari Paku pan madah ka diri enggau bala manok sabong iya deka enggau, tang sida iya apin sempat mindah nama apin abis nugal umai bukit.

Serta OKP Dana Bayang udah nemu runding semua Tuai Kayau Saribas bukai enggau Manok Sabong sida ti setuju deka enggau ngalah ka Undup, iya pan lalu ngasoh bala seruan ari Kumpang nya pulai awak ka madah ngagai bala sida din, iya enggau bala manok sabong iya ari Padeh, Layar enggau Paku deka datai enda lama agi ka Kumpang.

OKP Dana Bayang pan lalu milih manok sabong iya empu nambah ka enggi sida Unal “Bulan” ari Ulu Layar enggau sida Linggir “Mali Lebu” ari Paku. Manok sabong iya ka di bai OKP Dana Bayang iya nya Sabok “Gila Berani”, Bedindang enggau menyadi iya Isik seduai Senaang. Manok sabong Unal “Bulan” ari Ulu Layar nya Igoh Apai Lamban seduai Uyu apai Ikom. Nyadi manok sabong Linggir “Mali Lebu” ka enggau ngayau tu di ketuai ka Enchana “Letan Pulas Mas”, Birai “Jawa Jambai”, Minggat Apai Runai enggau Chulo “Tarang Bulan”.

Leboh semua pengawa ke nyendia ka kayau udah tembu diator, sida OKP Dana Bayang enggau beratus-ratus bala iya lalu angkat ari Padeh. Sida melunggang ka Skrang lalu bemalam samalam ba Nanga Lemanak. Hari siti sida lalu mupok bejalai ka Kumpang. Leboh sida datai din, sida meda nyau beribu-ribu bala endang udah nganti penatai sida. Penatai bala sida nya tadi ari Skrang, Seramat, Lemanak enggau Belambang.

Malam nya leboh ka berandau enggau tuai-tuai bukai, OKP Dana lalu nanya ngagai sida berapa penyampau sida ari Skrang, Lemanak, Saramat, Belambang enggau Kumpang udah sedia deka enggau bala. Sida madah ka iya bisi dua tiga ribu iko ti endang udah datai, lalu enda temu pemaioh ti agi deka datai. Udah ninga tu OKP Dana Bayang nanya sida baru sekali ka sida amat milih iya ngulu ka bala. Tuai sida lalu nyaut endang agi nitih ka semaia endang siga ngambi iya jadi ka tuai ngulu ka bala. OKP Bayang pan lalu madah ka sida enda ngasoh sida angkat dulu, laban agi nganti penatai Linggir “Mali Lebu” enggau bala iya ari Paku ka agi nembu ka tugal umai sida. Nya alai sida Kumpang kiroh bendar ngintu bala pengayau dalam kandang dua minggu leboh ka nganti penatai Linggir “Mali Lebu” enggau bala iya ari Batang Paku.

Dua minggu lepas nya, baru bala Linggir “Mali Lebu” datai. Malam nya OKP Dana Bayang pan lalu mai orang barengkah baum ka pasal kayau. Dalam aum nya, iya lalu nusoi ngagai Linggir “Mali Lebu” pasal pemutus runding sida Batang Lupar ti udah niri ka iya jadi ka tuai ngulu ka bala ngalah ka Undup. Linggir “Mali Lebu” pan lalu setuju serta madah ka atur nya betul bendar laban ko iya, ” nadai tuai bukai ditu bisi lebih agi ari nuan ti udah lama serta udah suah agi ngulu ka bala ngerja pengawa besai baka tu. Enti ukai nuan, OKP Dana “Bayang”, di padu nyadi ka tuai bala kitai, aku enggau bala manok sabong aku nyangka enda enggau bebala tang lalu pulai ngintu pengawa umai di menoa din,” ko Linggir “Mali Lebu” nampong jako iya tadi.

Udah ninga saut Linggir “Mali Lebu” nya tadi, OKP Dana “Bayang” pan lantang bendar ati. Iya pan lalu madah ngagai semua tuai bukai utai ti enda tau enda di kerja dulu dikena nyandia ka Kayau. Iya ngatur dua iko ari tuai ka dia ngiga tambak burong (ka deka di bai sida ngayau jadi ka tanda burong sida). Tumu pagi hari siti, seduai pan lalu nurun ngiga tambak burong. Apin lama udah nurun, siko ari seduai lalu ninga Ketupong Kanan, lalu tuai ka siko agi lalu ninga Beragai Kiba.

Udah nya, pagi siti OKP Dana Bayang agi ngasoh tuai dua iko bejalai ka babas ngiga tambak burung baru nambah iya ka udah. Siko ari seduai iya ninga Pangkas Kanan, lalu enchabut anak kayu ka tambak burong. Iya ka siko agi lalu ninga Embuas Kiba. Udah tembu nya tadi, seduai lalu bejalai sama ngiga tambak Kelabu Papau Kiba.

Lalu enggau tambak burung nya tadi, OKP Dana Bayang lalu madah ngagai bala tuai ka dia, “laban kitai bisi semua tambak burong tu, nama-nama pan burong bukai bisi didinga kitai leboh kitai mansang nurun ngayau ila, nadai tau pulai ka pengachau kitai,” ko iya.

Malam udah tembu pengawa ngiga tambak burung, sida pan lalu ngadu ka piring ading dikena sida ngangau ka Petara awak ka sida ulih nulong ngalah ka munsoh enggau lantang. Udah tembu pengawa miring, lemambang dua iko lalu diasoh barenong kayau ngangau ka orang Panggau Libau enggau Gelong datai nulong serta enggau sida iya ngayau ngalah ka munsoh.

Udah tembu miring, dua iko lemambang lalu diasoh ngangau ka renong kayau awak ka ngasoh orang ka berani ari Panggau Libau enggau Gelong datai nulong sida bamok ngalah ka munsoh. Lemambang ka barenong tu tadi endang mangkang mahligai pengaroh enggau senjata ti udah diengkah dalam mahligai awak ka orang ka bujang berani ari Panggau Libau enggau Gelong nyumpah samoa utai ngambi ka iya pulai bisa ti lalu tau nulong sida. Leboh lemambang udah badu barenong dinihari nya, sida pan lalu diberi orang ka bempu rumah makai pagi. Tembu makai, tuai rumah pan lalu ngempuru ka orang baum ba ruai iya laban deka nanya ka mimpi siko-siko malam nya.

Udah samoa bala penguang nusoi mimpi diri, OKP Dana Bayang pan lalu nanya ka mimpi tuai rumah empu. Saut tuai rumah, “mimpi aku malam nya asai ka munoh kaban beruang, udah nya aku lalu malik serta meda maioh bendar bangkai kaban beruang mati nyau baka garing kiba-kanan. Udah nya mega, aku asai ka ngalah ka kaban nyumboh, lalu leboh aku malik udah nya, peda aku bangkai nyumboh nyau baka garing sabelah tanah ngelingi aku dia.”

Udah ninga ka mimpi Tuai rumah nya tadi OKP Dana Bayang pan lalu ngasoh orang ti manah buah mimpi mupok nurun mansang nyerang enggau iya. Leboh sida bejalai nengah jalai nuju Undop, OKP Dana Bayang ngasoh bala ngetu enda lama, laban deka barengkah ngusok ka burong ka didinga sida serantau jalai sepagi nya (reti ngusok tu kena bebasa ka burong). Udah tembu ngusok, sida lalu majak ka pejalai sida, sampai ka sida datai ba endor sabengkah ti endor sida ngetu tiga malam beburong ka nyawa Ketupong kanan ka didinga leboh ka ngambi tambak burong nya suba. Tembu tiga malam sida beburong ba endor nya, sida lalu majak ka pejalai sida baru sampai ngagai tengah hari ka endor sida ngetu samalam ngibun tambak burong Beragai Kiba.

Tumu pagi siti, OKP Dana Bayang lalu ngerah bala bejalai baru ngagai antara menua enggau munsoh. Ba rantu jalai sida lalu ngetu samalam baru laban deka ngibun tambak burong Pangkas kiba. Hari siti sida lalu bejalai baru, lalu datai ba menoa enggau munsoh tengah hari rapas. Dia sida lalu bedampa awak ka bisi endor sida diau. Leboh orang ka biak agi tu benong bedampa, OKP Dana Bayang lalu ngasoh Sabuk “Gila Berani” seduai Bedindang ngulu ka bala dua belas iko bejalai ka dalam babas ngikup ka bala pengayau sabelah menoa nya dia ngagai jauh malam enggai ka dilanggar munsoh enggau ngenyit.

Pulai sida ngikup malam nya, OKP Dana Bayang lalu nanya ka berita sida. Bedindang lalu madah ka bala sida bejalai begadai-gadai dalam babas enda nengah arong jalai, lalu masok ngagai menoa munsoh. Sakeda sida niki puchok mengeris awak ka tampak endor sida meda ka endor rumah munsoh. Sida meda rumah panjai munsoh ari jauh. Udah tembu berati ka gaya rumah munsoh nya, sida lalu mulai ka diri ngagai tugong bala malam nya.

OKP Dana Bayang lalu nanya Bedindang, “enti kitai angkat tumu ari tu, ni ka maia kitai datai nuntong ba rumah munsoh?”. Bedindang lalu madah ka OKP Dana Bayang “Kitai tentu ulih datai din apin tengah hari. Kitai tau berapi dulu pagi nya enti kitai deka datai din maia tengah hari rapas.”

Ninga nya OKP Dana Bayang lalu ngerah bala berapi udah tengah malam awak ka ulih bakejang ari nya rerak tawas. Iya mega madah ka ngagai samoa tuai-tuai bala, iya ukai semina deka ngalah ka sabuah rumah munsoh aja, tang samoa rumah panjai munsoh sekayu Batang Undup. “Nya alai udah kitai ngalah ka sabuah rumah panjai munsoh ka tarubah iya tu, kitai lalu bepalan ari rumah nya ngalah ka rumah panjai bukai,” ko iya madah ka sida.

Tumu pagi siti sida lalu angkat bejalai nuju antara menoa ka semak rumah munsoh nya tadi. Datai sida ba pun kayu mengeris ti endor bala pematau ngila ka gaya rumah panjai munsoh dulu agi ari nya, OKP Dana Bayang lalu mai bala diau dia malam nya awak ka berandau ka atur deka negah munsoh.

Lemai nya, OKP Dana Bayang lalu ngangau bala pamesai tuai kayau iya baum. Dalam aum nya, iya ngasoh Sabuk “Gila Berani” seduai Bedindang mai dua iko bala bukai nyepai pemindah munsoh semak ka agi. Sakeda pengayau bukau diasoh iya jaga ngelingi dampa arau sida enggai ka dialah ka munsoh enda ngadang.

Pagi siti, Sabuk “Gila Berani” seduai Bedindang enggau dua iko sida bukai lalu nyau nurun mansang nyepai bala munsoh. Sida empat pulai ngagai dampa arau endang udah jauh lemai. Lemai nya OKP Dana Bayang lalu nanya rita sida empat ka nengkilun ka pendiau munsoh. Ko Bedindang, sida bejalai nengah jalai tang nadai batemu enggau munsoh. Semadi leboh sida udah datai nyau semak bendar enggau rumah panjai munsoh, sida bisi ngemata ka ari puchok kayu. Pemanjai rumah dipeda sida bisi tiga-puloh pintu.

Ninga rita nya, OKP Dana Bayang lalu ngasoh bala pengayau mengkang diau dia sahari da agi. Malam nya iya lalu ngerah bala tumu tindok ngiga mimpi. Bala ti ngambi kayu kena berapi diasoh ngambi kayu ti udah chukup mati serta rangkai bendar awak ka enda berasap enti dikena berapi laban sida udah semak bendar ari rumah munsoh.

Hari siti leboh bala pengayau ke biak nyau ngambi kayu api ka babas, tuai-tuai kayau serta enggau bala pengayau ti endang tau dikarap landik serta berani, lalu berunding ngiga jalai dikena ngalah ka rumah panjai munsoh nya. Sida ke berandau dia diulu ka OKP Dana Bayang empu, ditangkan ka Linggir “Mali Lebu” enggau Unal “Bulan”. Semua atur udah putus magang ba aum malam nya, semina nganti ka barengkah agi. Dalam aum nya, OKP Dana Bayang mega nanya ka pemaioh rumah munsoh dalam Batang Undup ngagai orang Kumpang. Sida madah ka ngagai iya rumah munsoh di Batang Undup maioh lalu sakeda nya bisi udah dialah ka enggau jalai Kayau Anak.

Ninga rita tu, OKP Dana Bayang lalu nerang ngagai sida ari Kumpang, ko iya “Laban aku udah minta bantu ari semua tuai kayau ari Batang Saribas ti berani serta bisi bendar paneleba dalam pengawa tu, aku enggai ngetu ngapa ngalah serta nyerang rumah munsoh datai ka semua sida alah magang nitih ka penembu ati aku.” Jako OKP Dana tu tadi ngenyit ka ati tuai sida ari Kumpang, laban ko ati sida iya semina ngalah ka rumah sabuah nya aja.

Udah badu makai malam nya, OKP Dana Bayang lalu ngerah semua tuai kayau nusoi mimpi diri malam nya ba moa maioh. Udah abis bala maioh betusoi ka mimpi diri, OKP Dana Bayang lalu nanya ka mimpi bala tuai kayau ari Padeh, Paku enggau Layar. Sida bela madah ka ngagai iya , semua lantang magang dalam mimpi.

Udah ninga ka semua utai tu, OKP Dana lalu bejako enda ngasoh sida ka jai mimpi enggau bebala, tang pulai ngagai rumah diri empu. Iya lalu ngatur tuai-tuai kayau nyengkaum Linggir “Mali Lebu” seduai Unal “Bulan” ngulu ka bala mansang nyerang nengah tiga batang jalai baka tu:

1. Tuai kayau iya empu ari Padeh bejalai ari tengah jalai.
2. Manok sabong Linggir “Mali Lebu” nengah jalai kanan.
3. Manok sabong Unal “Bulan” nengah jalai ari kiba.

Manok sabong orang ari Kumpang, Skrang, Lemanak, Seremat enggau Belembang diasoh diasoh bejalai ari belakang sida tu magang bebagi-bagi.

Sabuk “Gila Berani” seduai Bedindang bejalai dulu ka bala ba jalai tengah. OKP Dana nyemetak bendar jako madah ka bala ti ngena jalai tengah enda sekali-kali diasoh masok ka dalam rumah munsoh. Sida semina ngipa munsoh ti pansut ari rumah.

Serta hari terbak tawas, benong munsoh makai pagi, sida lalu ngenyit ngelanggar rumah munsoh. Dalam serang tu, maioh bendar bala munsoh parai, semina mimit aja ti bakal. Barang ti ulih lari, lalu ngelari ka diri. Perapasan maioh bendar ulih sida, baka tajau lama, bedil temaga, bendai enggau setawak.

Udah OKP Dana ditusoi ka Bedindang pasal serang sida tu, iya lalu ngasoh sida nguan rumah nya serta lalu dijaga enggau tegap awak ka likun ari langgar munsoh. Bedindang, Sabuk “Gila Berani”, Isik & Senaang lalu nyau ngulu ka manok sabong bukai bejalai nuju antara menoa nya enggau rumah panjai sabuah agi berati ka bala munsoh enggai ka bala munsoh ngenyit malas lalu ngelanggar bala sida. Sida bukai ti tinggal lalu napok perapasan sida sabelah babas ngelinggi rumah ti udah alah lalu diwan sida jadi ka palan.

Udah badu babela makai lemai lemai nya, OKP Dana lalu ngagau tuai-tuai kayau serta tuai bala bukai baum ba palan iya dalam rumah panjai nya. Sida bukai ka enda enggau baum diasoh iya jaga rumah ngelinggi nya dia. Dalam aum serak tu, iya ngasoh semua manok sabong enggau bala bukai sama ngingat ka jalai enggau akal sida ka nyerang lalu ngalah ka rumah panjai nya tadi lalu ngena atur nya nyerang rumah bukai ka deka diserang sida dia. OKP Dana lalu ngasoh Sabuk seduai Bedindang bejalai serta nengkilun ka pendiau munsoh hari siti, apin sida barengkah nyerang.

Datai ba maia hari siti Sabuk seduai Bedindang lalu mai bala dua tiga iko nengkilun ka bala munsoh ba rumah panjai ka ari ulu sida. Datai sida dia sida nadai meda orang siko laban orang dia udah lari dua tiga hari dulu ari nya.

Leboh sida pulai, sida lalu nusoi berita sida ka matau munsoh nya ngagai OKP Dana. Ninga rumah panjai munsoh nya nadai orang agi, iya pan lalu ngerah bala ngalah ka rumah nya pagi siti. Sida angkat ari nya nyerumba rerak tawas. Atur sida bejalai baka atur ka pejalai ka dulu agi ari nya. Leboh ka belangar tu, ka dua iko aja munsoh dibunoh sida. Rumah panjai tu alah enggau mudah laban munsoh udah ninggal ka rumah nya dulu ari nya. Bala sida lalu nguan rumah nya.

Leboh sida udah nguan rumah nya, bala manok sabong lalu belatur nyaga rumah nya. Sabuk seduai Bedindang lalu bejalai jauh ka dalam babas berati ka bala munsoh enggai ka bisi nginau sabelah menoa nya lalu ngenyit nyerang bala sida. Leboh seduai rembus ba umai orang, seduai lalu batemu enggau dua iko orang melaki bini ti mansang deka mantu munsoh. Leboh tapeda ka seduai, bini lelaki nya nyau getar-getar takut. Sabuk seduai Bedindang lalu nanya ka penunga seduai. Seduai melaki bini madah ka diri datai ari Merakai, Kalimantan Indonesia laban bisi ninga berita Rumah Jarup di Ulu Undup dialah ka orang Kumpang. Sabuk seduai Bedindang pan bisi ninga berita nya lalu deka nemu berita nya terang agi ari orang ka empu rumah nya. Orang melaki bini nya tadi lalu madah ka ngagai Sabuk seduai Bedindang, orang ti agi ulih ngelari ka diri ari langgar munsoh lalu lari ngagai rumah panjai Suring di Ulu Undup lalu diau serta belindung dia. Sida mega udah minta bantu bala Kantu ari Merakai nulong sida nan ka rumah ngelaban penyerang ari Kumpang.

Udah ninga semua rita tu, Bedindang seduai Sabuk pan madah ka diri deka pulai lengkas dulu awak ka ulih mantu bala Sureng nan ka diri ari langgar munsoh. Seduai pan lalu mulai ka diri ngagai bala sida lalu nusoi rita ti ulih seduai ngagai OKP Dana.

Udah ninga berita tu OKP Dana lalu bejako nunga tuai orang Kumpang, lalu nanya ka runding sida pasal ka deka ngalah ka rumah Sureng. Sida bela nyaut enda ulih meri penemu laban udah arap enggau penuh ka OKP Dana serta samua tuai bukai ari Saribas enggau bala manok sabong sida nulong munas serta ngalah ka sida ti selalu nyerang orang Kumpang dalam kandang empat lima taun ti udah lalu.

OKP Dana pan lalu nanya ka tuai sida ari Lemanak, Skrang, Seremat enggau Belembang pasal ti deka ngalah ka rumag suring. Sida bela nyaut madah ka diri endang nitih ka kayau OKP Dana ngagai sebarang kayau ti diulu ka iya.

Udah mending ka runding tuai kayau ari Batang Lupar, OKP Dana lalu nanya ka penemu Linggir “Mali Lebu” ari Paku serta Unal “Bulan” ari Layar. Linggir seduai Unal lalu mansut ka jako. “Kami tu ga udah nitih ka kayau serta mantu bala OKP Dana ngelaban Undup, Kami duai enggai ninggal ka nuan sa-agi-agi nuan ngerja pengawa.”

Udah ninga runding bala maioh, OKP Dana pan lalu bejako, “Enti semua runding udah sagala munyi nya, kitai patut majak ka pengawa ti deka ngalah ka Iban Undup. Kitai anang kakang ngulu ka bala ngelanggar rumah Sureng, ti endor bala munsoh udah nguta diri ari bantu bala Kantu enggau orang bukai ari menoa Indonesia.”

Malam nya OKP Dana ngasoh sakeda bala manok sabong iya bejaga jauh dalam babas ngelingi endor nya enggai ka bala munsoh bisi belalai matau bala sida. Iya mega ngelalau bala iya enda ngasoh munoh bala munsoh ti bisi meda bala munsoh dalam babas. Sida ka bejaga tu diulu ka Sabuk “Gila Berang seduai Uyu Apai Ikum. Sakeda sida ngaga kuta ngelinggi nya kena nagang pemudah tempoh munsoh enti munsoh bisi datai. Sida mega lalu nan beribu-ribu tukak digaga ari batang nibong serta buloh temiang.

Hari siti Bedindang seduai Uyu Apai Ikum bejalai ngagai umai orang ti endor Sabuk seduai iya betemu enggau munsoh melaki bini dua hari dulu agi ari nya. Kebuah seduai bejalai kia nyangka munsoh enggau bini iya mengkang agi dia nganti bala Kantu bukai ti datai mantu bala Sureng di Ulu Undup. Datai dia seduai nadai agi meda munsoh nya dia. Nya alai seduai lalu majak ka pejalai seduai jauh agi sampai ngagai seduai rembus ba pendai semak rumah panjai Sureng.

Leboh seduai benong bejalai sabelah menoa semak rumah munsoh nya, seduai lalu tapeda ka orang dua iko benong mungga kayu api ba tebing sungai. Seduai lalu nanya ka penatai sida tak bebala maioh baka nya. Sida madah ka Bedindang seduai Uyu, sida datai ari Merakai sama enggau pangan sida ti benong mandi dibaroh ba sungai. Bedindang lalu nanya ka pemaioh sida udah datai nguang Sureng. Siko ari munsoh nya tadi lalu lalu madah ka orang ari maioh buak rumah di Merakai bisi datai tiap-tiap hari nulong nan ka rumah Sureng.

Uyu pan lalu nanya, sekali ka bala ari Merakai enggau bala Sureng semina deka nan ka rumah ari langgar munsoh aja tauka nyerang munsoh dulu. Orangnya lalu bejako madah ka semua parengka ti dikena bamok udah tembu magang, lalu Sureng deka ngulu ka bala nempoh bala munsoh ba palan munsoh empu pagi pagila. Ninga tu Uyu seduai Bedindang pan lalu madah ka diri deka mandi enggau pangan sida ba pendai di ili dia sabedau niki ka rumah Sureng. Seduai lalu beguai-guai mulai ka diri ngagai bala sida.

Udah datai ba langkau palan, OKP Dana enggau bala tuai bukai lalu ngulu Uyu seduai Bedindang nanya ka berita seduai ti udah pulai matau munsoh. Seduai lalu nerang ka sida pasal pejalai seduai ke datai ba pendai rumah Sureng ka endor seduai betemu serta berandau enggau orang dua iko ti madah ka seduai iya bala Sureng dibantu bala penguang Kantu deka datai nyerang sida pagila lalu enda nan di rumah Sureng empu. “Nya alai kitai enda tau enda nyendia ka diri ngelanggar sida ba rumah sida empu tauka kitai nan ditu pagila,” ko Uyu nusoi berita ngagai OKP Dana enggau tuai-tuai ke bisi dia.

Nya alai tak sahari-hari nya sida majak nguta palan sida enggau chukop tegap serta lalu nambah ka pemaioh tukak ditanam sida ba samoa endor ari luar kuta sida.

Udah badu makai lemai nya, OKP Dana lalu ngangau ka baum baru ba endor iya, awak ka mutus ka semua kerja ka nyendia ka diri. Dalam aum nya iya ngator lapan iko manok sabong ti dikarap ka iya bendar diulu ka Bedindang seduai Uyu negah bala munsoh enggau ngenyit, tang nganti kira dua puloh iko udah masok kandang antara enggau rumah panjai sida iya empu. Pia mega iya ngelalau bala maioh enda ngasoh sida ngamok dulu, sebedau sida ti diasoh ngipa negah munsoh, baik ka munsoh nitih ka sida tau ka enda.

Tumu pagi siti Uyu, Bedindang sama enggau Isik seduai Senaang enggau orang bukai ti udah diator nyempulang seduai lalu nyau ngagai endor sida ti negah, enda tentu jauh ari endor kuta sida. Udah tembu sida belatur, sida lalu barengkah ngeram ka ipa ba tisau jalai. Enda bangat lama udah sida ngeram ka ipa, nya baru bala besai munsoh datai mansa jalai sanentang sida ka ngeram ka ipa. Sida lalu angkat ari ti ngipa lalu negah bala munsoh serta nachah ka munsoh ti udu bendar tekenyit. Sida udu bendar bamok enggau panjong-panjong. Leboh ninga panjong sida, bala ka tinggal ba kuta lalu ngadang serta ngatur diri ba endor ti manah, nan ka rumah enggau kuta ari dalam pagar kuta. Sida bamok udu bendar.

Bala munsoh nyau enda nemu utai asai nya agi diansak ka bala pengipa. Enti sida surut, sida dijamah orang ka ba kuta. Sida nyau baka rauh, lebih agi leboh sida kena tebak tukak apin sida datai ba senentang rumah panjai ti udah tegap bendar kena kuta sida OKP Dana. Bala munsoh maioh bendar parai lalu iya ka bakal mega ditangkap sida.

Udah pukas sida ka bamok tu tadi, OKP Dana lalu meda ka pemaioh bala iya ka bisi bakal. Bala sida ari Kumpang enggau Belambang bisi parai. Tang laban sida ka bamok tu tumu tembu, nya alai bisi bendar hari sida numbak ka bangkai bala sida ti bisi parai udah tengah hari nya.

Nyau udah makai lemai nya, OKP Dana lalu ngangau ka baum baru. Dalam aum tu iya bejako mai bala ngalah ka rumah Sureng tumu pagi siti. Iya lalu ngasoh semua manok sabong ti landik serta taleba nyendia ka diri lamai nya. Orang bukai ka enda ulih enggau nyerang diasoh nyaga kuta enggau orang ka bakal. Sabuk lalu bejako madah ka nya bebuai dadu bendar ninggal ka sida baka nya laban enti munsoh datai baru nyerang kuta tu, tentu sida ka bakal serta sida bukai enda ulih enggau nyerang tu nadai penyadi. Tang ko OKP Dana, “munsoh tentu enda datai agi udah ka rusak bendar kena alah ka kitai pagi tadi. Udah sida alah bendar baka nya, samoa penguang Sureng tentu pulai ngagai menoa sida empu di Kalimantan Barat.”

OKP Dana lalu bejako mai bala ngelanggar rumah munsoh ngintai ka maia sida makai pagi rerak tawas. Malam nya semua sida diasoh nat ka diri enggau chukop serta tindok tumu ngintai ka mimpi. Agi dinihari dalam, OKP Dana lalu nanya ka mimpi bala sida. Iya lalu ngasoh bala sida ka enda manah mimpi tinggal lalu nyaga bala sida ti bakal enggau sida ti enda enggau tadi. Iya samina mai semua sida ti manah mimpi enggau iya.

Leboh sida datai ba rumah panjai Sureng leboh maia rerak tawas, OKP Dana lalu ngulu ka bala iya masok ngagai rumah Sureng. Iya lalu dientudi ka Linggir “Mali Lebu” seduai Unal “Bulan”. Leboh sida bejalai nengah ruai nyandang nyabur ba jari sida, sida nemu ka dua-tiga iko aja munsoh bisi diau ba rumah nya. Leboh bamok sida nyau ka munoh semua munsoh enggau nadai penangul. Sida lalu pulai ngagai palan sida enggau lantang laban nadai bisi siko bakal. Sida bulih bendar tajau lama, setawak, bendai, chapak lama enggau utai bukai jadi ka perapasan dibai sida pulai.

Kena nanda pamenang iya ti ngalah ka Undop, OKP Dana Bayang semina mai benda Guchi sigi ti agi mengkang disimpan peturun iya di Lubok Nibong, Baram, nambah ka benda menaga enggau benda rusa. Linggir “Mali Lebu” beperapasan ka benda menaga sigi ti diintu bala ichit iya di Matop, Paku. Bala manok sabong ti bukai sama bela bulih perapasan magang, baka tajau lama enggau bedil temaga enggau parengka temaga bukai.

Udah bekau tasah diserang bala OKP Dana Bayang enggau orang ari Kumpang, orang Undup lalu lari ngagai dua bengkah bagi menoa. Maioh agi sida ngagai Salimbau dalam Kalimantan Barat, lalu ti bukai nya lari ngagai Ulu Lingga lalu diau enggau bala Balau.

Nyau kelama udah nya menya, leboh Mr. Brereton megai kubau Skrang, sida diasoh pulai baru ka Undop, tang leboh sida datai dia sida nemu menoa Skrang Ili udah diwan orang ari Skrang, lalu di Ulu Undop udah diwan orang Kumpang.

Dalam taun 1843 (11/6/43) leboh Sir James Brooke seduai Admiral Keppel ngalah ka Saribas ba Nanga Padeh. Udah ti alah belanggar di Nanga Padeh tu nya ngujong ka OKP Dana Bayang enggau Linggir “Mali Lebu” dikangau ka Rajah James Brooke ngagai kapal iya di Tanjong Sabuloh dalam kandang Saribas Ili ngasoh seduai iya nyerah ka diri nundok ka Parintah. Tang iya enggai nyain surat ti ngasoh iya nyerah laban iya agi enggai nundok tau ka ngelala Perintah ti di pegai Rajah Brooke. Lalu maia nya mega Rajah James Brooke bisi nulis pasal seduai ti munyi tu:

“Orang Kaya Pemancha Dana Bayang ari Saribas diatu bisi lalu ngagai aku …iya tu orang ti pemadu iya diketakut ka serta mega mutus berani. Iya enda besai gamal lalu pendiau iya likun serta umur iya nyau tuai. Lengan kanan iya singkong lalu tuboh iya penuh laban litan abi pantap serta abi tumbok sangkoh. Aku deka bendar berati serta merening gamal iya, lalu ari semua tuai bukai dalam batang ai nya, ba runding aku, iya siko tuai ti pemadu pandai serta lurus ngiring bala anembiak iya.”

“Siko agi tuai bansa asal ti sama bisi lalu ngagai kapal aku iya nya Linggir. Tubuh iya baruh, manah bendar di peda. Mata iya gining-gining baka perening mata ular bisa leboh iya duduk atas deck kapal. Aku enggai badu merening ulah iya ti likun laban ari perening mata iya ti tajam bisi pangering, pemintar lalu nemu beparagam ka utai dudi hari ila. Silak mata iya mit serta tajam indah baka jarum kompas.”

Nyau lama udah lepas ngalah ka Undop, dalam taun 1853, Iban ti diau di Layar, Padeh enggau Paku Ili, bisi nanggok buntal ba Tanjong Kauk ari ulu Nanga Rimbas dalam Batang Saribas. Tiap-tiap taun ba sanentang nya endang maia buntal ngempas ka diri deka batelu. Nyau beratus-ratus bala Iban bebuntal dia nyengkaum OKP Dana Bayang enggau kaban iya.

Sakali benong orang maioh benong betangguk ngena perau ba sungai nya, peda datai bala Balau mudik ai Saribas ngena perau pengayau ngalah ka sida ti benong berikan. Bala balau endang nemu sanentang nya endang endor orang betanggok maia nya taun. Sida lalu bamok enggau munsoh besenjata ka sengayuh laban maioh sida nadai mai duku, semina mai lungga kena nasa buntal. Bisi sida nutuk munsoh ngena turus enggau sebarang utai ti di kemisi ka sida di dalam perau. Ba ke bamok tu maioh bendar perau sida karam lalu sida maioh lemas tauka parai dibunoh munsoh.

Ari beratus orang ka berikan dia, semina OKP Dana enggau sakeda sida bukai ulih nan ka diri ngena duku ti enda panjai ti dikena sida nasa buntal. Udah semua kaban belayan iya nyengkaum Isik seduai Senaang parai lemas enggau kena bunoh, OKP Dana Bayang pan lalu terjun nyemerai ka tebing deka ngidup ka diri. Iya lalu dititih ka munsoh betubuh sabelas iko ti babendar amat nguji deka nangkap iya. Leboh iya datai di tebing, iya lalu mutar ngelaban munsoh ngena duku mit ti mengkang digengam iya. Sida babendar amat ngelaban OKP Dana, tang munsoh tak enda tebakal ka iya, laban kulit iya kebal. Nyau kelama sida udah bamok, bala Balau pan nyau mansang lembut salembut. Nyepi diri enda telaban ka iya sida lalu lari ninggal ka iya. Udah sida abis lari, OKP Dana pan lalu luput laban udah kelalu ikak.

Iya dani tumu pagi siti lalu mupok bejalai nengah pala pantai nebing ai Saribas datai ka iya batemu enggau Melayu siko ti endang taleba bendar enggau iya. Iya pan lalu pinta anjong Melayu nya pulai ngagai rumah sida di Padeh.

Lepas bala Balau ti udah bebunuh ka orang berikan di Tanjong Kauk, OKP Dana Bayang lalu ngangau ka Linggir “Mali Lebu” ari Paku seduai Unal “Bulan” ari Layar ngagai rumah iya di Padeh. Iya mai seduai nya berunding deka mai bala besai ngalah ka Balau ba Bukit Banting nya empu. OKP Dana Bayang nanya seduai iya enti seduai sama setuju mantu iya enggau bala iya. Linggir “Mali Lebu” seduai Unal “Bulan” bela madah ka diri sama setuju laban deka bebalas ka pemati orang maioh ka dibunuh bala Balau di Tanjong Kauk.

Tang enda mukai-mukai, leboh sida benong nyendia ka kayau tu, OKP Dana Bayang kena jangkit penyakit Tampok Buah lalu parai ditambah ka penyakit bukai dalam taun 1854 lalu ditumbak ka di pendam Terusu dalam Padeh. Anak iya ti benama Umpu mega parai sama kena jangkit penyakit dalam taun nya.

Udah parai OKP Dana Bayang, iya lalu diganti anak lelaki iya ti benama Aji tauka Saji nyadi ka tuai di Padeh enggau Ulu Layar nyengkaum Spak. Taja Aji biak agi ari Nanang seduai Luyoh, tang iya berani serta landik agi megai orang ari aka tuai iya dua iko nya. Iya nyadi tuai enda lama, engka empat taun aja, laban iya parai leboh ka betachah enggau munsoh ba Sungai Langit dalam bulan April, 1858. Iya lalu diganti menyadi iya OKP Nanang jadi ka tuai.

OKP Nanang mai bala iya nundok ka perintah Brooke dalam taun 1861 ba kaki Bukit Sadok udah Raja James Brooke besemaia mayar 400 igi rusa dikena nundok serta bebaik. Iya lalu dibai Perintah Raja Brooke ngalah ka Kayan di ulu Rajang dalam taun 1863. Laban pemerani iya serta enggau penaluk iya ka perintah Raja Brooke, iya diberi Rajah Brooke pangkat Orang Kaya Pemancha ba moa tuai-tuai bukai ke begempuru di Fort Alice, Simanggang dalam taun 1886.